Minister Otmar Oduber:
ORANJESTAD (AAN): Durante un conferencia di prensa di Gobierno, prensa a puntra Minister di Labor Otmar Oduber, tocante e asunto na Marriott Casino, na unda cu 16 empleado di e casino tin chens di perde nan trabao.
Segun Oduber, Diabierna el a worde notifica atravez di un carta di parti di Marriott, cu relaciona cu un re-organizacion, nan tin pensa di retira un cantidad di persona for di e casino.
E mandatario a bisa cu pa casualidad e hendenan cu ta bay worde kita, ta e mesun hendenan cu algun tempo pasa a bringa basta tempo pa por a drenta den un sindicato.
E Minister a splica cu ora cu el a haya e carta el a tuma contacto cu AHATA y el a manda un carta pa Marriott cu cual como Minister di Turismo e tin un hopi bon relacion.
Sinembargo Oduber a bisa cu e ta tambe Minister di labor y trahadornan mester worde proteha pa nos leynan laboral.
Y tur trahador tin e derecho di afilia nan mes na un sindicato.
“Den e carta mi a mustra en todo caso mi desapunto y mi lo kier mira kico ta e reaccion di parti Marriott pa loke ta e re-organizacion aki pasobra di e 16 hende cu ta worde retira, 15 a afilia nan mes na e sindicato”.
Esaki segun Oduber kende a sigui bisa cu turismo ta creciendo y hotelnan ta hayando mas entrada y pesey e kier haya sa exactamente kico ta e motibo cu ta bay kita e personanan aki.
“Mi ta spera cu no ta pasobra e empleadonan tin un afiliacion na un sindicato cu nan ta bay worde kita”, segun e mandatario.
El a splica cu pesey un team di departamento di labor a bay Marriott, pa haya sa mas di locual ta sosode.
