Home Politica Analisis politico

Analisis politico

0
0
SHARE
- Advertisement -

E MEP di awe

Casi e partido MEP ta birando comico cu nan accionnan di ultimo tempo. Un paar di dia pasa Evelyne a organiza un fiesta grandi na e centro di partido cu tabata un fracaso completo. E fiesta tabatin como meta  duna Evelyne e forza como lider di partido pasobra e ta sinti cu e no tin liderazgo di berdad di MEP. Cada rato Nel Oduber ta na radio y television papiando den nomber di MEP cosnan cu no ta cuadra cu loke Evelyne ta papia.

For di e comportacion di Nel tur hende por wak cu Nel no ta di acuerdo cu e manera cu Evelyne ta maneha e partido. Esaki hunto cu e manera cu Evelyne a bira lider ta pone cu masha poco di e dirigentenan di MEP ta sinti cu Evelyne ta e lider corecto pa saca MEP for di su cayida feroz. Hopi votador di MEP y un grupo di e lidernan di partido ainda ta di opinion cu Marisol lo tabata un miho lider pasobra e tin hopi mas tempo den MEP y e tin hopi experiencia como miembro di parlamento y como ministro.

Pesey esnan cu ta simpatiza cu Marisol den MEP no ta haya cu loke a worde haci cu Marisol ta husto. E motibo cu nan a saca Marisol for di partido tabata pasobra Marisol a vota pa leynan cu a kita privilegionan for di e politiconan. Leynan sumamente positivo pa nos pueblo. Evelyne no a vota e dia cu tabatin votacion. El a core sali for di sala di parlamento.

Si Marisol a comete traicion door di vota pa e leynan Evelyne tambe a comete traicion door di no vota contra e leynan aki manera MEP ta bisa cu a worde dicidi den partido. Despues a bin e drama di Booshi Wever. Booshi a cera un deal cu Nel cu si Booshi saca  Marisol for di partido Nel lo a sostene Booshi pa bira lider. Booshi a saca Marisol for di partido pa e mes bira lider. Despues Booshi a worde cori for di partido door di Nel. Nel a yama Booshi traidor, un politico baliarina, cu ta  hiba politica manera un lagadishi y e ta bringa cu hende muhe.

Ta di e manera aki Evelyne a bira lider di partido y pesey Evelyne mes ta sinti cu e no tin ningun control over di su partido. Un gran cantidad di fanatico di MEP no ta kere den Evelyne. Nan lo a prefera di mira Marisol of Booshi como lider di partido. E otro porblema cu e partido MEP tin ta cu no tin nada di programa of plan pa futuro di pais. E unico cos cu nan tin ta un blachi cu 10 punto cu nan a lanza na aña 2001. Di e diez  puntonan nan  no a realiza ni un den e 8 añanan cu a sigui.

Te awe MEP no tin nada di plan of programa. E unico cos cu e dirigentenan di MEP ta haci  mescos cu e partido chikito Bikker ta cada rato cu tin un grupo di hende cu ta contra algo diripiente nan ta para banda di e gruponan aki gritando cu nan lo percura pa cumpli cu deseonan di e gruponan. Aki no ta porta si ta Molina, tinted glass, harpoen, canasta, revolver den cas pa tira choller cu a horta pida ham for di frigidaire mata of kico cu ta cada rato nan ta para banda di e hendenan aki sin cu nan tin un programa pa splica pueblo kico nan ta desea di haci pa nos pueblo.

Awo pa confirma tur esaki nan ta pone pagina grandi den corant cu nan ta paga premio pa esun cu lo gana den un rifa door di manda aden pintura  di un logo nobo y un  slogan nobo pa partido. Nan no ta trahando riba programa drechi maske pa haci loke nan a haci den pasado di show cu programa sin ta prepara pa realiza puntonan di programa.

MEP a bira un partido bashi bringando internamente sin un direccion cu contenido. Un partido sin ideal, sin programa y sin un lider. Ta esey a resta di MEP y henter pueblo ta mirando esaki. Nel pleitando cu Evelyne pasobra e no ta satisfecho cu loke Evelyne ta haciendo y un Booshi cu ta bringando manera alma malo mustrando e doñonan di MEP cu e ta un bon MEP y no ta husto cu nan a schop e for di partido. E partido aki ta buscando logo y slogan nobo.

- Advertisement -

DUNA COMENTARIO

Please enter your comment!
Please enter your name here