Diario Online

Analisis politico

Publication: Tuesday, 24 July 2012. Categoria: Politica

Ni un alma na trabao

ORANJESTAD (AAN): Ni un alma na trabao ariba Avenida Milio Croes, ex Fergusonstraat, despues di tres or di merdia y den fin di siman. Un di e cayanan di mas druk di nos isla ta cera pa lunanan largo pa worde drecha. Awe nos tin e colmo.

   Si bay wak un rato con e trabaonan ta worde haci hende ta  haya un sinti di rabia.  Un paar di dia pasa nos a tende e hefe di DOW splica cu nan a yega na e conclusion cu por traha anochi tambe en bez di stop tur trabao prome cu tres or di merdia pa no papia mes di weekend. E speranza a worde ruina pa su mayan. Nada no a cambia.

   Avenida Milio Croes lo kesa cera pa basta tempo mas mirando e manera cu ta worde traha. Un biaha mas nos mester enfatiza cu nos ta nenga di kere cu ta pa falta di capacidad nos pueblo ta worde castiga door di e mesun hendenan cu a fiesta hunto cu ex ministro Marisol ariba e famoso brug corupto na Noord. Nan tin nan mes capaña y esaki ta bayendo cu hopi exito. Pueblo ta bon rabia y cosnan ta bay bira pio.

   De La Sallestraat ta cera caba pa casi un aña y si bay wak awe e caya aki ta keda cera pasobra awo nan mester traha e stoepi. Henter De La Sallestraat ta ocupa cu e tegelnan cu mester worde poni y pesey e caya ta cera pa ken sa cuanto tempo mas. No mester di ningun inteligencia pa sa cu en bez di pone tur e tegelnan ariba caya por pone un truck pasa cu e tegelnan y laga e personanan pone nan mas lihe posibel. Nos a compronde cu tin un comision special cu mester controla e trabaonan di infrastructura pero lamentablemente nos no ta ripara ningun cambio. Nos tin un conseho pa e comision aki pa laga traha un buki di e proyectonan ridiculo manera esun di Caya Petronia, Caya Betico Croes  y De La Sallestraat pa gobiernonan den futuro siña con no mester traha. Awo e proximo drama tan a caminda.

   E construccion di e rotonde di vliegveld ainda no a  ni cuminza y ya caba tin retrazo.

   Hendenan di DOW a declara cu e trabaonan no por worde inicia pasobra  materialnan cu mester no a yega ainda. E storia di semper. Awo prome cu cuminza mes tin e excusanan fofo corda mas leu den tempo. Cuanto tubo nan ta bay haya cu nan no tabata sa di dje. Cuanto waya nan no ta bay topa cu nan no tabatin un idea di nan existencia. Cuanto riool nan  lo bay topa su pa nan ta algo completamente nobo.

   Nan a ni cuminza y ya caba tin retrazo como sifuera cu ta awo nan a realiza cu mester di cierto material pa traha. Si e asuntonan aki no tabata asina serio hende lo mester hari pa loke ta sosode. Siman pasa DOW diripiente a cera e entrada pa yega na e botonan di piscador dilanti cas di Gobernador. E hefe di DOW mes a bin splica cu nan a worde sorprendi cu e construccionnan a yega na elugar ey y awo numa nan ta bay prepara e construccion di un bahada pa boto banda di Surfside. No un trahador simpel di DOW a bin splica nan fayo den esaki pero ta e hefe mes.

   Awo a bira tempo pa duna hopi atencion na e hecho cu e responsabilidad no ta di e grupo di DOW so pero tin un comision cu hendenan cu  ta suppose di tin dos dede di sinti y cu mester mira e disaster cu ta tumando luga den construccion bao guia di DOW. Un mas ridiulo cu otro causando dañonan grandi na nos hendenan y muy en particular na nos politiconan. E hecho cu  tin un comision por tin su bentahanan pero tin su peliger tambe. E peliger ta cu como ta un comision ta actuando no tin personanan directamente responsabel y un ta sconde tras di otro. Esey ta duna nos un situacion cu nos tin un gobierno cu ta haciendo un tremendo trabao pero nan ta worde boycotia door di e hefenan di DOW cu ta para un banda hari e  ministronan. Pa colmo nan ta logra cada pasa un paar di dia pa pone e ministronan bin defende  nan publicamente loke probablemente e minstronan ta haci pa trata di evita cu cosnan lo bira pio. E situcion aki mester cambia awe!