ORANJESTAD (AAN): Ronela Croes di ATA Dialuna a hiba palabra durante conferencia di prensa di Gobierno, relaciona cu presentacion na Prome Minister Mike Eman di e cifranan di turismo pa loke ta prome 6 lunanan di 2012.
El a bisa cu ATA ta contento cu Minister di Turismo Otmar Oduber a keda satisfecho.
ATA a gradici tambe APA pa nan sosten den esaki y tambe Gloria Vega cu ta ‘Cruise and Niche Manager’ hunto cu su team cu a traha duro.
Segun sra Croes, e aña aki ATA a cuminza cu combersacionnan cu Royal Caribbean Cruise Line y despues a sigui tambe cu Pullman Tours, despues cu aña pasa tabata trahando riba Carnival Cruise Lines.
Tur esaki den cuadra di e maneho pa aumenta e cantidad di bishitante den ‘low season’, pa loke ta trata turismo di Crusero.
“Di parti di ATA, nos rol den esaki tabata pa comunica cu e lineanan y a mustra nan e interes di parti di Aruba y como partner na mesa a bin na acuerdonan na beneficio di e linea di crusero y nos tambe como pais Aruba”.
Esaki segun sra Croes, kende a sigui bisa cu APA a participa tambe den esaki.
El a splica cu Aruba a posiciona su mes como un partner hopi agresivo pa loke ta trata logra e metanan cu tin.
Segun sra Croes, e lineanan a haya e mensahe cu: “we mean business”.
“Nos lo continua traha riba e parti di mercadeo cu campañanan hopi inovativo”, segun Croes.
E intencion ta tambe pa esnan cu bin cu crusero dicidi despues pa bin bishita Aruba pa mas di un dia.
El a splica cu e ta hopi contento cu e logro pa 2013 y 2014 unda un total di 125.351 pasahero di crusero lo bishita nos isla den e periodo cu ta worde considera ‘low season’.
Segun señora Croes, e resultado di ‘stay over’ di Juni, esaki a crece cu 7,5% cu ta equivalente na mas o menos 10.000 pasahero adicional.
Esaki ta pone cu den e prome 6 lunanan di e aña, tin un crecimento di 2,2%.
Remarcable ta cu di parti di Merca na Juni e cantidad di bishitante a crece cu 4,1%.
For di Sur America total tabata tin un crecimento di alrededor di 14,9 %, mientras cu for di Europa esaki tabata 2,7%, pa loke ta luna di Juni.
