Awor tin mas motibo pa cuestiona hentere asunto di Hospital
Parlamentario Booshi Wever ta haya nan reaccion fofo…
ORANJESTAD (AAN): Segun Parlamentario drs. Booshi Wever, den su reaccion e compania BAP, Bermello, Ayamil & Partners, cu tabata involvi den e proyecto corupto y mafioso di racetrack, tambe a “beat around the bush” di henter e issue principal di e discusion esta: DESTAHO PUBLICO!
“Ningun momento mi a cuestiona e trabaonan di BAP, sino mi a cuestiona e modus operandi di tanto gobierno, SOGA y BAP; mi a cuestiona e procedura. Pues no trata di desvia e atencion riba e issue central (esta destaho publico); sinembargo, ningun di su ponencianan a, of lo ponemi cambia di opinion riba e compania aki, y mi ta para 100% tras di loke mi a bisa anteriormente, y tempo lo bay duna mi razon.”
“Di con mi ta bisa asina? Di con no ta bisa algo riba e relacion estrecho cu BAP tin cu Calmaquip, cu Birk Hillman, cu Rauol Gutierez of cu Ralph Sanchez? No ta companianan y personanan cu tabata meti den proyectonan corupto pafo di Aruba? No ta e compania y persona tabata involvi cu e proyecto di aeropuerto di Aruba cu a costa nos pueblo miyones di Florin extra?”
“No ta mesun Ralf Sanchez y Calmaquip cu a strica cu miyones di Florin di e pueblo Arubano, den un proyecto corupto di Racetrack? Si ta un consultant so BAP tabata di e proyecto corupto di Racetrack, di con riba internet ta poni na
Aruba Motorsport Complex: “The project was carried out by BAP, the same group who worked at Homestead Motorsport Complex”. Segun mi “carried out” nifica mas cu ta un simpel consultant!
Ta di con cada vez e nomber di BAP ta “pop up” ora pone e nombernan aki?? Pa casualidad?
Un di e companianan cu ta hopi amigo di BAP, cu pa casualidad tambe a mustra interes pa e proyecto di expansion y renobacion di HOH, tambe tabata involvi den un caso di corupcion na Merca.
Esakinan tambe ta algo infunda y falso?? Of aki nos por papia di un modus operandi mafioso? Ta p’esey mi a pone for di comienzo cu Al Capone, e mafioso mas grandi di historia, a camufla su practicanan mafioso asina bon, cu Husticia Mericano no por a sentenciele pa e actonan mafioso, sino pa fraude cu impuesto. E tipo di practicanan aki ta worde catalogisa como: ” A closed circle”!
Pues aunque bo nomber no ta aparece, esey no necesariamente ta nifica cu bo no ta involvi!
Den e declaracion di e abogado di BAP, cu by the way tambe tabata cobra un balente montante di placa den e epoca cu AVP/OLA tabata na mando na aeropuerto, a bisa di con mi no a acerca BAP, pa haya informacion riba e compania. Mi no mester acerca e compania pa e informacionnan, ya cu e promenan yama pa dunami contesta riba mi preguntanan, ta e Minister concerni y SOGA, y ainda mi ta wardando riba contesta. Ambos, esta e Minister concerni y SOGA, ta nenga di dunami contestanan riba mi preguntanan, y esaki siendo cu mi a haci preguntanan varios luna pasa caba. Mi preguntanan ta mas bien riba e hecho cu NO tabata tin destaho publico, y e motibonan pakico a scohe pa tene un destaho bow man. Y ora tanto Minister como SOGA/AIB, nenga di dunami contesta, pues ta scohe pa NO ta transparente, mi mester bay tras di informacion cu mi ta haya for di tercera persona. Y tanten cu mi no haya e informacionnan cu mi ta desea PRETO RIBA BLANCO, mi no tin ningun motibo di kere loke e abogado di BAP ta trece padilanti den defensa pa su cliente. Y como cu esaki ta puro bla bla na defensa di su cliente, cu no necesariamente mester ta berdad, mi no tin ningun motibo pa hala ni un palabra atras di loke mi a trece caba den publicidad.
Kizas BAP lo por contesta e preguntanan aki pa mi:
* Di con no a bay un destaho publico manera Curaçao ta haciendo?
* Cua ta e companianan cu a ser acerca pa duna un Expresion of Interest
(EOI)?
* Di con no a haciele uno habri? Di con a keda den un “Closed Circle”?
* Di con e prijs di Curaçao cu ta 104miyon dolar pa un hospital nobis nobis di
330 cama, y esun di Aruba ta costa mas, pa menos cama, y NO pa un hospital
nobis nobis?
* Di con e prijs pa meter cuadra ta mas o menos 2 biaha mas caro cu esun di
Curaçao?
* Di con no a sinta na mesa cu companianan cu a acerca SOGA y Infra-Team pa
participa na un DESTAHO PUBLICO, bisandonan cu nan ta laat? Te hasta un
candidato cu SI a participa den e destaho publico na Curaçao, y pa colmo e
ta den e ultimo tresnan.
* Di con ningun di e companianan cu a ser invita pa e destaho bow man, no a
participa na e destaho publico na Curaçao?
* Finalmente: Unda BAP a keda durante 8 aña largo?
Mi tin hopi mas pregunta cu mas despues mi lo bay haci. Y e preguntanan aki tambe por ser contesta pa e INFRA-TEAM, cu ta esunnan cu den nomber di gobierno ta Wheel and Deal y kier bin purba di convencemi cu tur cos ta ok.
Un mensahe cla y raspa pa tanto BAP, Minister Visser, SOGA/AIB y Infra-Team: mi lo no sosega tanten cu mi no saca tur puito for di e macuto aki. Den e dianan aki cartanan lo sali pa instancianan internacional riba e
bagamunderia aki. Mi lo manda un carta pa instancianan Americano hudicial riba e modus operandi di BAP. Pues e carta cu e abogado a manda den nomber di BAP, no a spantami, ni a convencemi.
Hopi lo ta puntra di con ta insisti pa NO tene destaho publico! Ta kico tin pa sconde anto? Ta ki miedo tin? E contesta ta facil! Un destaho publico lo tin como resultado cu e prijs pa e construccion lo ta REAL. Contrario na loke ta sosediendo, e “closed circle” lo manipula cu e prijs pa mantene e prijs exageradamente halto! Pues majan ta nos pueblo lo mester paga pa e prijs artificial aki. Y Infra-Team sa esaki! Soga/AIB sa esaki! Y BAP sa esaki miho cu tur hende! Ta ken ta e master-brain tras di e master-plan aki? Y no lubida cu mas halto e prijs ta, mas BAP lo cobra, corda ta un porcentahe nan ta cobra di e totalidad! Y ta hustamente esaki ta e motibo pa NO bay destaho publico! Ami no por pensa nada otro!
Por favor, no traha smoke-screen pa desvia atencion; tanten cu no tin destaho publico, pa mi e proyecto aki ta CORUPTO, y tur esnan envolvi ta co-responsabel y ta haci nan mes co-culpabel di henter e corupcion miyonario aki.
