Boneiro kier logra un acuerdo di Aduana cu Aruba pa transporte di productonan
Evert Piar, Presidente di Camara di Comercio di Boneiro
ORANJESTAD (AAN): Desde aña pasa Aruba a cera un convenio di cooperacion cu Hulanda y ta basa riba e convenio ey cu Camara di Comercio di Boneiro mesora a cuminsa traha riba e mision comercial, pasobra siendo riba un distancia asina cortico for di Aruba, cu Boneiro ta mira hopi oportunidad economico entre e islanan.
Evert Piar, director di MCB Bank Bonaire pero alavez Presidente di Camara di Comercio a bisa di ta masha contento cu e interes grandi expresa entre comerciantenan di Boneiro y di Aruba na e “Trade Mission Bonaire-Aruba” tumando luga den Westin Resort Aruba.
E presidente di Camara di Comercio di Boneiro a confirma cu desde 10-10-10 a nota un aumento drastico den e cantidad di companianan for di Aruba cu a bay establece nan mes na Boneiro. Esaki ta debi principalmente pasobra cu como un isla BES, Boneiro tin mucho mas facilidad fiscal pa ofrece awendia cu tabata por den pasado. Teniendo e realidad ey na cuenta, Camara di Comercio a opta pa bin cu un mision comercial pa Aruba y asina sondea e posibilidad nan pa negoshinan di Boneiro tambe por penetra den e mercado Arubiano. Sea nan ta bin establece aki y bende nan productonan of den forma di un laso di cooperacion cu un compania di Aruba pa por bende nan productonan y expande nan posibilidad nan den e mercado aki tambe.
E reto sinembargo ta keda e transporte y aspectonan fiscal pa transporte di producto di y pa Boneiro for di Aruba. E intencion no ta pa e productonan bira mas caro, al contrario, e pueblo Boneriano kier logra haya miho prijsnan door di cumpra producto y servicionan for di Aruba. “Ta esey mes ta e meta di e bishita y di e acuerdo cu lo cera entre Gobiernonan di Aruba y di Boneiro, pa mira con por yega na un forma di protocol entre Servicio di Aduana y Impuesto pa por manda carga pa Boneiro cu un miho areglo”, asina Evert Piar di Camara di Comercio a duna di conoce. El a bisa di ta pensa por ehempel den creaccion di un “Douane Entrepot” pa por yuda e pueblo Boneriano.
Camara di Comercio di Boneiro ta masha contento cu Gobierno di Aruba a demostra interes pa yega na un acuerdo riba e tereno aki. Anualmente Boneiro ta cumpra 150 miyon Florin na producto for di Corsou y como tal, e lo por crea hopi oportunidad di negoshi pa comerciantenan di Aruba si logra un acuerdo asina.
