ORANJESTAD (AAN) – Diahuebs 5 di Juli a wordo conmemora e fecha di Independencia di e Republica Bolivariana di Venezuela, cu un acto protocolar riba Plaza Libertador Simon Bolivar, cu a cuminza cu entonacion di e Himnonan Nacional di Venezuela y di Aruba, ponemento di krans na pia di Estatua di Libertador Simon Bolivar, discurso di Consul General señor Jesus Javier Arias Fuenmayor, palabranan di Prome Minister Mike Eman, y un bunita programa cultural cu baile folklorico na encargo di e grupo di hoben y mucha “Corazon de Venezuela”.
Tambe tabata tin musiconan cu a interpreta cu guitara y canto algun bunita cancion cu a bira popular mundialmente, entre nan Caballo Viejo, Rosario por cierto canta pa Pastor Doedel Sophia ken tambe a interpreta un Gaita dedica na Maracaibo, cu a ranca hopi aplauso.
Riba combinacion di potret por aprecia algun imagen di e programa protocolar y cultural aki. A capta hopi atencion e hecho cu nan a pone tapijt cora pa e invitadonan cu a wordo ricibi cordialmente pa e personal diplomatico. Presencia di nos tata di cultura Padu Lampe, a wordo hopi aprecia.
