Consul Tarquino Pacheco cu palabra di gratitud infinito na Aruba pa su acogida na su compatriotanan residente
Den nomber di Gobierno di Colombia y di su mes:
ORANJESTAD (AAN) – Durante e ceremonia di conmemoracion di e di 202 aña di Independencia di Republica di Colombia, Lic. Tarquino Pacheco, Consul General a hiba palabra.
El a cuminza pa recorda kico a conduci na e grito di Independencia di su pais, riba un dia 20 di Juli, un dia di mercado na unda un crioyo a bay pidi fia un florero cual acto, aparentemente efimero, a desata un levantamento entre crionan y Spañonan, y e hecho aki a culmina den e independencia di e nacion.
Un acontecimento cu tabata un consecuencia di hopi circunstancia cu a desemboca den e asina yama Grito di Independencia di Colombia.
Consul Pacheco a indica cu den e circumstancianan aki por destaca na prome lugar, cu den e huntanan realiza entre aña 1808 y 1810, cu apesar cu e crioyonan a wordo invita siendo e mayoria, nan representacion tabata minimo, unda cu di 45 miembro cu a forma dicho hunta tabata tin 36 peninsular y solamente 9 crioyo cu tabata representa e interesnan di e pueblo, y cu tabata e minoria. Esaki a haci cu e crioyonan pa prome biaha a contempla e posibilidad di crea nan propio estado-nacion, na unda cu nan mes por a tuma nan decisionnan envez di depende di un grupo di Spaño cu tabata dicidi pa nan propio futuro.
Como consecuencia y previo na e Grito di Independencia, a wordo crea e asina yama Hunta di Notable cual a ser integra pa autoridadnan civil y intelectual crioyo.
El a menciona e nombernan di e personanan cu a pensa riba un strategia pa perturba e orden publico y tuma e poder for di e Spañonan, y manera nan a planea asina a sosode.
Consul Pacheco a remarca cu tabata hopi e sufrimentonan cu e raza noble, Amerindia cu tabata habita no solamente e Continente Americano sino tambe e Islanan di Caribe, a pasa aden.
Aworaki Colombia ta un pais cu ta lucha di manera permanente pa mehora e condicionnan di bida di su hende, apesar di diferente coyuntura adverso genera pa factornan relaciona cu e terible flagelo cu awendia e humanidad ta enfrenta, manera e narcotrafico, cu a crea un dependencia psico-activo den e generacionnan nobo cual ta wordo considera como e combustible cu ta genera violencia, no solamente na Colombia, pero den hopi latitud den nos universo.
Esaki ta e problema cu a obliga, durante e ultimo 50 añanan, na hopi Colombiano na desplaza nan mes na e interior di e pais, kiermen di e provincianan pa e capitalnan di e diferente departamentonan y incluso, emigra na otro nacionnan.
Pesey e gobierno di Juan Manuel Santos kier a transmiti un mensahe na tur e Colombianonan cu ta habita pafo di e pais, y cu pa tal motibonan, esta violencia y e confrontacion arma cu e pais ta bibando for di mas cu 40 aña pasa, y cu ta atravez di e narcotrafico cu e organizacionnan terorista aki ta wordo financia pa somete e pueblo Colombiano pa biba hopi situacion di violencia y dolor.
Na e ciudadanonan Colombiano aki cu ta den exterior, na e mas di 15 mil compatriota cu ta biba den e hermoso Isla di Aruba, cu a ricibi nan manera nan propio hogar, na unda nan ta sinti e afecto, cariño, respet y amor, no solamente di parti di e autoridadnan di Aruba sino pa e pueblo mes.
Den nomber di su gobierno y su mes persona como vocero y representante di su Pais, Consul Tarquino Pacheco a expresa palabranan di gratitud infinito na e pueblo di Aruba y su autoridadnan pa nan acogida na e residentenan Colombiano.
Olie Maduro
Nos prome minister a papia great na Entertainment center…. Pero bo kier pa e Colombiano nan entegra na Aruba , anto po ta adreseer nan na spaño????? Na unda nan papiamento a keda ,, nan no kier e paspoort Hulandes?? Wel ki mishibo cu nationalidad Hulandes anto bo no por papia ni papiamento korda Hulandes …..Nan ta haciendo Aruba dushie tera un ” Little Colombia “Ami bay Hulanda si mi no tene mi mes na e regla nan ,, mi ta perdie,, corda sin por papia Hulandes!!!!!