ORANJESTAD (AAN) – Durante e acto protocolar riba Plaza Libertador Simon Bolivar, diahuebs mainta, en ocasion di a conmemora 201 Aniversario di e Declaracion di Independencia di e Republica Bolivariana di Venezuela, Prome Minister mr. Mike Eman, a duna un discurso na Spaño, den nomber di Gobierno y di pueblo di Aruba.
Seguidamente e discurso di Premier mr. Eman traduci na Idioma Papiamento.
“ For di profundo di nos curazon nos kier braza tur e Venezolanonan y nan descendientenan cu tin residencia na Aruba, pasobra algun minuut pasa nos tabata tin un momento di reconocimento na Libertador Simon Bolivar, y nos tabata tin representa e comunidad Indigena di Venezuela.
“ Mi a haya e honor di bishita e comunidad Indigena di Latinoamerica, cu ta e mesun di Venezuela y Colombia; esaki ta e Comunidad Guayu, y mi por a comparti cu e expertonan arkeologico di Aruba cu e comunidad Indigena di Venezuela ta e mesun comunidad Indigena cu a construi e prome oranan di humanidad na Aruba; anto nos ta comparti e origen di nos pueblo.
“ Poco pais por tin raiznan asina comun, manera Aruba y Venezuela tin. Pesey awe nos tin cu duna un gran tributo di reconocimento na e trabao cu e habitantenan original aki di nos pueblonan. Nan a implanta den nos curazon e determinacion aki di sirbi e suelonan cu awe nos ta sirbi.
“ E emocion, dedicacion y determinacion cu nos por a sinti den e palabranan di e Consul General di Venezuela, ta un refleho di e comunidad original aki, cu Aruba y Venezuela ta comparti.
“ Señores y señoras ban duna un aplauso na e historia comparti aki cu Aruba y Venezuela tin. Hermanos y hermanas, un aña pasa den e mesun temponan aki, e Consul General di Venezuela, mi amigo Jesus, a regala mi un cuadro hopi grandi y impresionante di Siman Bolivar. Y este cuadro di Simon Bolivar, bo nos pone atencion special na su rostro, por mira hopi momento di cicatriz di batayanan gana pero tambe di batayanan perdi.
“ Por mira den su rostro momentonan di alegria pero tambe hopi momento di desapunto. Y ora bo mira e rostro di Simon Bolivar asina bon representa den e cuadro aki, bo ta haci e pregunta fundamental ‘di unda a saca e persona aki, e homber aki, e energia pa sigui si den su rostro tabata mustra tanto señal di desapunto y tambe di batayanan perdi.
“ Pero no mester wak tanto na su cara so pero na su wowonan, unda tabata tin solamente señalnan briyante di atencion y determinacion, pa su obhetivo final. Tabata su obhetivo final cu tabata decisivo pe, di sigui cu su lucha pa supera e batayanan perdi, pa supera e momentonan di desapunto, y yega na e momento di gloria y victoria. Asina mester ta pa nos tambe, awendia, cu nos tin tanto responsabilidad, tanto trabao pa haci pa nos enfoca riba e meta final di sirbi nos pueblonan y nos paisnan. Hopi felicidad na e comunidad di Venezuela, hopi momento di orguyo, pasobra boso tin un historia pa ta orguyoso di dje. Hopi felicidad, hopi bendicion y PABIEN!”
