Diario Online

Dos pasahero local perhudica pa proceso di douane

Publication: Monday, 2 July 2012. Categoria: Policial

ORANJESTAD(AAN): E dos pasaheronan Davina Ellis y Micah Landsmark a pasa den un disgusto grandi den fin di siman. Nan tabata biahando hunto riba e vuelo di KLM pa Hulanda.

   Un di nan tabata tin su dos yiunan di 8 y 13 aña hunto cune. Nan no tabata bayendo di vacacion pero mas bien pa bay biba na Hulanda. Nan a schrijfuit na Aruba y tur caminda. Kiermen nan seguro di AZV tampoco ta on mas. Nan tabata para den rij cla pa biaha y dos miembro di douane a acercanan.

   A puntranan si nan tin bolita. Un yamada a drenta bisando autoridad cu ambos ta biahando cu bolita. Nan a nenga pero despues a busca grensbewaking pa bin y asina a detene ambos. A yama famia pa busca e muchanan cu a pasa den un trauma total pa loke a sosode.

   Ambos dama a ser hiba y a perde nan vuelo. Nan no a bay hospital pa saca X-Ray. A duna ambos laxante pa bebe y nan a keda separa uno na cada warda te mainta desde atardi. Tur pasobra un yamada a drenta cu nan ta biahando cu bolita. Ambos dama sinti cu nan por a laga nan sigui nan vuelo y notifica autoridad na Hulanda pa atende cu nan.

   Nan problema ta cu awor polis y douane ta core pa e responsabilidad kende ta bay regla e cambio di ticket pa nan por yega back Hulanda. Casi sigur mester paga. Den weekend tabata tin vuelo pa Hulanda y di ningun forma ta keda cla. Parce mester warda te dialuna pa asina bolbe bay na oficina principal di douane pa mira con lo haci cu e ticket y e cambio pa sigui pa Hulanda. E proceso aki ta algo cu mester worde atendi seriamente pasobra inocentemente ta sera hende cu no ta meti den cosnan ilegal y laga nan perhudica tambe.