E di dos fase di Juana Morto Complex kedando cla
ORANJESTAD (AAN): Compania di construccion Bellagio NV di Chelito de Kort ta cabando cu e di dos fase di e proyecto di renobacion Juana Morto Complex.
Gabinete Mike Eman a pone como un prioridad halto pa mehora calidad di bida di ciudadanonan, esaki ta encera entre otro renobacion di 24 bario rond di Aruba. Un di e promenan cu a bin na turno ta Juana Morto Complex.
E prome fase di e proyecto aki a bira e modelo di un bario moderno di Aruba cu a keda presenta na Reina Beatrix durante su bishita aña pasa na luna di October na Aruba.
E prome fase di e renobacion a encera 12 cas cu a haya panelnan solar riba nan dak, como un proyecto piloto.
NV Elmar ta cumpra e coriente genera, dunando e habitantenan un reduccion riba nan cuenta mensual. E trabaonan di renobacion pa e di dos fase cu a cuminsa mas o menos tres (3) luna pasa, ta finalisando, segun Chelito de Kort.
Aki ta trata di 16 cas, di cua mita ta keda entrega otro siman y e resto despues. Esaki ta nifica cu pa fin di e luna aki, 28 cas di Juana Morto Complex a keda cla cu nan renobacion, mientras cu falta 24 mas cu ta bay keda cla prome cu fin di aña.
E compleho ta conta cu 52 vivienda di un camber, baño, sala y cushina chikito. Cumpliendo cu peticion di e habitantenan, FCCA a logra agrega tambe un pida cura patras di e cas.
E plan di Gabinete Mike Eman y FCCA ta encera renobacion tambe di e complehonan di Yara y Pos Chiquito cualnan mester bay destaho publico prome cu fin di aña.
Renobacionnan no ta tumando luga solamente den barionan pero tambe den centronan di ciudad y edificionan di balor historico pa Aruba. Miyones di Florin Gabinete Mike Eman ta invertiendo den e mas di 80 proyectonan cu tin andando na Aruba.
