E siman aki e cruzada di aeropuerto lo worde cera completamente
Relaciona cu inicio di spiraal rotonde:
ORANJESTAD (AAN) – Den conferencia di prensa di gobierno, Ing. Marlon Croes, director interino di DOW, a hiba palabra pa splica e cambionan cu ta bin den trafico, relaciona cu e construccion di e rotonde den e cruzada di aeropuerto.
Ing, Marlon Croes a menciona cu e siman aki nan ta cerando e cruzada di aeropuerto por completo, pa nan por inicia e trabaonan unda cu e companianan di utilidadnan ta bay ta re-ubica tur e cabelnan, etc., pa asina por haya e terenonan apto pa cuminza construi e spiraal rotonde cu ta bay bin den e area aki.
Den cuadro di esaki a worde traha un plan di cambio di ruta. Prome cu ceramento di caminda ya caba tin trabaonan ta tumando lugar y den e proximo tres dianan aki ta cuminza asfalta e camindanan cu ta bay sirbi como plan di rutanan alternativo pa por carga e trafico cu ta bay core rond di e cruzada aki.
Ora e trabaonan di ponemento di asfalta conclui e siman aki, lo pone borchinan cu ta indica con e automobilista ta bay yega su destinacion.
Tin borchinan cu leternan preto riba un background orange, cu ta bay indica cu esey ta e colornan di e rutanan alternativo cu ta bay tin.
Na momento cu lo cera completamente e area unda e spiraal rotonde ta bin, e publico lo ripara cu e cruzada lo disparce totalmente y lo por mira e companianan di utilidad tirando nan cabelnan y cobando, pa despues hala e cabelnan den e situacion nobo. Esaki ta bay dura te cu 31 di Augustus venidero y despues di e periodo aki e contratista concerni ta bay cuminza e trabao di kibra e cruzada completamente y ta bay pone banchi pa forma e rotonde, inicia cu ponemento di asfalt y e borchinan cu ta bay bin na diferente lugar.
Ing. Marlon Croes a señala cu e preocupacion di DOW ta e movecion di e trafico durante e oranan cu nan ta bay circula den e area aki. Esaki ta un punto delicado unda cu DOW a eherce diferente trabao hunto cu aeropuerto pa loke ta trata e entrada y salida pa garantiza cu e operacionnan ta keda 24 ora e siete dianan di siman disponible pa e bishitantenan y nos comunidad.
Ing. Croes a haci un yamada na automobilistanan pa nan duna nan cooperacion pasobra ta bay drenta den un periodo dificil, unda cu DOW lo ta trahando te cu final di November.
Bachi
Hopi bon pero, con ta para cu e caminda di plantersrust cu ta bay sero biento, cual sigur hopi di e trafico lo bay desvia tog den e direction aki pa evita e retonde, nos di e bario ta bay come mas stof riba djesun di tur dia sin conta e dump illegal cu tin caminda e holor di bestia morto insoportabel den nos cas nan, gobierno bin gobierno bay ningun no kier hasi nada cu situacion aki.