Home Editorial Editorial: UN CUESTION DI MENTALIDAD Y ENVIDIA

Editorial: UN CUESTION DI MENTALIDAD Y ENVIDIA

0
0
SHARE
- Advertisement -

         E ceramento obliga di Hooters y Benihana no ta e resultado di un maneho inadecuado, sino di un tipo di mentalidad destructivo acompaña pa un bon dosis di envidia.   Aruba ta un isla chikito, unda tur hende conoce otro, loke di un banda ta bon, pero di otro banda no ta dje bon ey.   Como cu nos famia semper tabata resalta pa su poder economico, mescos cu na tur otro parti di mundo, el a atrae e miradanan nocivo di kendenan tabata kier a yega na e tipo di posicion economico ey, pero no tabata tin e capacidad, conocimento comercial o confianza di cualke banco pa logre.

           E mentalidad cu normalmente ta surgi y predomina den  un situacion asina ta uno di envidia, di pensa cu si nan no por, pakico otro si. Y e ora ey un sentimento di envidia implacable ta tuma over. Y si pa mala suerte cos bay malo pa e empresa o persona o famia cu nan ta envidia, nan ta celebra un fiesta mental pa e ceramento di un negoshi mas, amen di tur e personal cu ta keda riba caya y cu no ta conta cu nan consideracion tampoco.

          Cierto ta cu Hooters y Benihana tabata mantene nan mes bon, pero tabata riba un tereno aheno, di un americano cu no conoce e significacion di e palabra consideracion o husticia. E problema no a surgi cu Hooters y Benihana mes sino cu e kiebra di un compania cu tabata yama ERA y cu ta esun cu a firma e contrato di huur cu e doño di Brickel Bay. Pero, ta Hooters y Benihana tabata pague huur tur luna, y nunca a cay atras. Ta un huez hulandes a habri caminda pa el a saca e companianan di e edificio cu e compania mes a construi cu su placa, y no cu cualke financiamento o fabor di e doño di Brickel Bay, e kiebra di ERA (no di Hooters o Benihana!) a sirbi como pretexto legal, danki na e huez Hulandes, pa el a saca nan for di e edificio (aunke nan no tabata debe ni un cent di huur!) pa e keda cune y huur e cu cualke stranhero amigo di dje o cu pa razonnan financiero tabata cumbinie mas.

Como cu ERA tabata maneha pa e mesun doño di Filtec, cu tabata tin bon contratonan cu e refineria, dia cu esaki a cera su portanan, e servicio di belasting no a tuma na cuenta e trahadornan di e compania sino cu manera warawara a core pone beslag riba e fondonan cu Filtec tabata tin na e refineria y cu tabata mas cu suficiente pa paga tur e trahadornan y e suplidornan. Aki ta trata di otro grupo, cu no kier a mustra consideracion pa e trahadornan cu tabata bay keda sin nan salario y sin trabao, cu a core pasa man pa loke Filtec tabata tin den su haber na e refineria. E combinacion di e hamber pa placa di e americano di Brickel Bay,  e accion di belastingsdienst a causa tur e problema cu a obliga e benta den un acto publico di e propiedadnan di Hooters y Benihana.

Nos no tin ningun problema cu e benta ey pasobra e ta conforme cu Ley.  Cuanto placa Belastingsdienst ta bay haya di e benta mi no tin ningun idea, pero e no ta bay ta gran cos pasobra tur e mobilarionan ta hopi bieu, di mas di diez aña di servicio diario, y ta perde e oportunidad di a la larga cobra por lo menos cien o hasta mil biaha mas placa cu loke e veiling ey ta bay produci. Atrobe e ta un cuestion di mentalidad, di persecucion (politico tambe, cu mi lo splica den otro ocasion) y di un envidia cu no conoce frontera.

E comentarionan di otro medionan di comunicacion mi ta laga pa esunnan cu a skirbi nan, por ta como otro manifestacion di envidia ya cu mi tin entendi cu e posibilidad ta grandi cu un di nan por lo menos por desaparece por completo. Y si e no desaparece mes, nunca e lo por pasa e nivel di circulacion cu e tin awor, cu ta uno insignificante den un mercado domina completamente pa DIARIO.

Como cu semper mi a obra cu cartanan riba mesa ora ta trata di duna Pueblo informacion, mi ta hacie den e caso desagradable aki tambe, pasobra e tin e derecho di conoce e pormenornan envolvi. No ta asina cu e companianan Hooters y Benihana a kibra! Nan tabata victimanan di ERA, e doño di Brickel Bay y Belasting, un combinacion cu a resulta nan fatal den nan operacionnan comercial. Y mas cu nada otro, nan a haya nan lomba contra muraya cu e ceramento di e refineria y e kiebra di ERA, combina cu e sentencia grotesco di e huez Hulandes cu pa falta di razonamento a permiti e doño di Brickel Bay saca nan di nan propio edificio siendo cu nan no tabata debe ni un solo cent preto di huur, y nunca a faya tampoco den e pagonan ey!

- Advertisement -

DUNA COMENTARIO

Please enter your comment!
Please enter your name here