E eleccion cu ta na caminda ta bay ta uno hopi interesante, pasobra tin hopi incognita cu tempo so por despeha concretamente. Bo por specula cuanto cu bo kier, kere cu MEP, por ehemplo, ta destrui y no tin posibilidad, cu Andin ta doño di un partido di un solo candidato, cu AVP ta conta cu mas asiento di loke el a saca caba, pero e realidad cu por clarifica tur e puntonan anterior ta fuera di nos alcance actualmente.
Pa cuminza, MEP no ta destrui, e tabata den e ultimo lunanan desorienta, pero ya el a cuminza move caba den e direccion corecto, y si e sigui asina, e lo por recupera un gran parti (y posiblemente e totalidad) di e tereno cu el a perde cu e batayanan politico interno cu a desoriente. Ta mi opinion, basa riba loke mi sa di e partido pasobra mi a milita den dje durante hopi aña den e epoca di Betico, cu MEP ta bay ta bon prepara pa e campaña cu practicamente a cuminza caba, aunke e no a drenta den su acostumbrado velocidad ainda. Tempo lo comproba si mi tin razon o ta completamente ekiboca, aunke cu e experiencia di mas di 30 aña observando politica di cerca na Aruba, mi ta duda den e posibilidad di un ekibocacion.
Pa loke ta Andin, mi ta kere cu e ta bay structura su partido hopi bon, y ta combersando cu candidatonan di peso, entre nan Marisol, cu mi ta supone lo tuma e decision corecto di fortifica su posicion den beneficio di su futuro den politica. Si e dicidi di bay cu Andin, loke mi ta kere ta cumbinie enormemente, e resto di e candidatonan cu Andin seguramente tin na bista caba lo por garantize un resultado hopi positivo. Durante e ultimo añanan nos a mira un Andin hopi practico, hopi sigur di su mes, y enfocando asuntonan cu ta di gran interes pa Pueblo. E no ta papia djis pa sali den corant o na television, sino cu como Parlamentario e ta tratando materianan di importancia den e momentonan actual. Esey ta ganando tereno pe constantemente.
AVP di su parti a para bira un prisionero di su laurelnan, lagando e exito di eleccion pasa hacie kere den y pronostica resultadonan di e proximo eleccion cu hopi hende, ami sigur entre nan, no ta comparti. Supone cu pasobra e contrincantenan ta aparenta un debilidad cu no ta real, y pesey e caminda ta hancho habri pa aumenta e resultadonan electoral di e pasado reciente, no ta parcemi realistico. Tin hopi incognita ainda pa dilucida prome cu bo por cuminza pronostica cu certeza loke por sosode den e futuro cercano. Ta hopi temerario na e momentonan actual di sinta conta puyitonan cu no a nace ainda!
Pa complica e panorama un poco mas, nos tin un refineria cu ta den un “si y no” constante pa loke ta trata su apertura; Oranjestad su cayanan ta den un desareglo total mientras e promesa di un trein cu ta bay soluciona mil problema turistico ta ser ventila cu cada soplo di biento cu ta bin di pariba; comercio den Caya Grandi no ta exactamente contento cu e lentitud di e trabaonan cu no ta parce di tin fin por lo pronto; e panorama mundial pa loke ta trata economia no ta dunando señalnan di un recuperacion na tempo pa faborece cualke Gobierno di cualke pais den e garanan di eleccion, y banda di nan tin un sinfín di otro incognitanan cu ta complica e vision demasiado optimista di un partido cu mester sa miho.
Si mi ta di pusta awe riba e resultadonan di proximo eleccion, lo mi pone mi apuestanan riba e creencia cu ningun partido ta bay saca mayoria su so, pero e lo ta hopi ariesga di mi parti pasobra ainda tin tanto complicacion cu mester ser simplifica prome cu mi por haya un bista real di kico ta kico, y cua ta e posibilidadnan di cada partido cu ta bay participa den e eleccion ey.
