Diario Online

Fercand Sophia rumbo pa Milan

Publication: Tuesday, 31 July 2012. Categoria: General

Hoben local cu chens unico

ORANJESTAD (AAN): Recientemente, AC Milan Junior Camp Aruba 2012 a termina cu ceremonia di clausura na stadion Guillermo Trinidad ( U-9 pa U-17). Tur participante a ricibi nan certificado di participacion despues di un siman di trabao hopi duro. Tambe nan a ricibi un tas di Adidas y un bala di AC Milan y mas importante ainda, nan a bay cu un experencia inolvidable di e siman.

   E coordinacion technico di e siman tabata na encargo di Alessio Spataro y Guiseppe, e dos coachnan official di AC Milan, hunto cu e coachnan locual (Raimy, Jeremy, William, David y Kendrick).

   Durante di e ceremonia tambe a anuncia e hungado cu a ser selecciona pa bay Milan mas laat den aña.

   E hungado a resulta di ta Fercand Sophia. Fercand lo participa hunto cu Rogyair Michiel (Curaçao) y un hungado di Bonaire na e evento yama Milan Junior Camp Day na Milan (Italia) den luna di October 2012. Milan Junior Camp Day ta un programa cu ta ser organiza tur aña como clausura di diferente Milan Junior Camp nan cu ta organiza rond mundo. E hungadornan lo haya oportunidad pa topa tur e otro ganadornan di Milan Junior Camp mundialmente, bishita e facilidadnan y oficinanan di AC Milan den e stadion San Siro y sera conoci personalmente cu algun di e estreanan di AC Milan.

   Riba e potret por mira entrega di e certificado y tambe e ganado di e biahe pa Milan.

   Ademas a anuncia e hungadonan masculino y femenino cu a ser selecciona pa ser inclui den e pre-seleccion hunto cu e hungadornan di Curaçao y Bonaire cu lo representa Aruba Bonaire y Curaçao (Milan Dutch Caribbean) na diferente torneonan internacional di AC Milan final 2012 y den 2013 na Colombia, Oklahoma y Florida. Durante di e torneonan scout di AC Milan tur Universidad y schoolnan importante di merca  lo tey pa observa y recluta talentonan.  E ta un oportinidad unico pa nos hoben nan pa demostra nan talento y haya contacto cu clubnan professional y schoolnan.

   Tabata tin diferente participante a base di un sponsorship di gobierno di Aruba y compania nan local. Tur participante a gosa di AWA y Powerade durante e seccionan

CAMS y Raimy Davelaar ( coordinador local) por wak back na un organizacion hopi exitoso den cual e hobennan a haya oportunidad di drecha nan nivel di futbol riba base structurally bao di guia profeshonal di AC Milan. Tin compromisonan haci pa organiza e camp otro aña atrobe na Aruba y otro localidad den Caribe.