Fundacion “Family First” Centro di Prosperidad di Famia
ta buscando edificio pa cuminza funciona mas pronto posible
ORANJESTAD (AAN) – Fundacion “Family First” (Famia Prome), Centro di Prosperidad di Famia, actualmente ta bezig buscando un edificio pa cuminza funciona mas pronto posible, y preferiblemente na Savaneta, Pos Chikito of vecindario.
Asina e miembro di e directiva sra.Annelies Schoop a duna di conoce den un entrevista cortico cu DIARIO.
E Fundacion aki tin e mision di ta “Un yabi pa famianan fuerte y saludable” y nan meta ta logra esaki, yuda y guia e famianan tambe ora nan tin problema.
Nan ta sali for di e punto di bista cu cada persona tin un anhelo profundo pa libertad, seguridad, speranza, respet propio, y kier tin e oportunidad pa duna un contribucion na famianan, comunidad y mundo.
Segun e filosofia di e fundacion “e principionan di desaroyo di famia ta cuminza door di yuda famianan reconoce y traha constructivamente riba e forza poderoso aki, den cada ser humano, y cu e personanan mester wordo restaura na un sentido di auto-dependencia sano”.
Esaki basa riba e hecho cu famianan sano ta inter-dependiente cu famianan extendi, amigonan, gruponan cultural, social y spiritual, bisiñanan y coleganan di trabao.
CENTRO PA PROSPERIDAD DI FAMIA:
Esaki ta un lugar den un bario di nos comunidad, na unda famianan por bin hunto y cualkier residente di e comunidad por haya sosten pa asuntonan di famia, na unda informacion y servicionan ta obtenible pa contribui na e crecimento y salud di tur miembro di e famia: adultonan, hoben y muchanan.
UN CENTRO PA PROSPERIDAD TA OFRECE:
- Programanan pa construi relacionnan sano
- Ta yuda pa famianan desaroya forza y capacidad familiar. Famianan ta reconoce nan forzanan y nan tin un oportunidad pa traha riba nan forzanan pa medio di varios vehiculo, incluyendo e Plan pa Prosperidad Familiar.
- E ta funciona manera un centro di encuentro. Mayornan y otro miembronan di e famia ta topa cu otro den un ambiente cu ta desaroya y fortalece nan relacion y nan capacidad.
- Ta yuda obtene acceso na recursonan pa yuda famianan
- Ta duna enseñanza tocante principionan pa, por ehemplo, salud familiar, con pa ta un bon mayor, y con pa logra salud financiero.
- Un Centro pa Prosperidad di Famia ta un lugar caminda tur hende ta bon bini.
E motibonan pakico mester di un Centro pa Prosperidad di Famia ta:
- Sosten familiar ta trata di inverti den un promocion di cosnan positivo y cu famianan kier pa nan yiunan. A lo largo, sosten familiar ta un inversion di e comunidad pa crea ciudadanonan feliz, sano y productivo.
- Pa ta un mayor, ta rekeri di esfuerzo
- Mayornan mester un medio ambiente cu ta sostene nan
- Famianan ta sufri bao di un aumento di stress y tension
- E ta dificil pa famianan tin acceso na servicionan
- Famianan cu problema mester di yudanza y speranza cu cambio ta posible
- Extension di cuido y apoyo pa famianan sano, ta reduci aislamento y ta construi conexionnan den y entre famianan y comunidad.
VISION: Famianan sano pa un Aruba prospero!
MISION: Pa medio di un centro den algun bario di Aruba, yega na e famianan y ofrece nan sosten, informacion, servicionan cu lo stimula y dirigi nan riba un caminda, pa ta un famia uni, fuerte y sano.
Pa mas informacion: cpfaruba.info@gmail.com.
Personanan di contacto Annelies Schoop y Fern Duinkerk.
