Gabinete Eman ta perhudica contratista nan local
Parlamentario Arondino Croes:
ORANJETSAD (AAN): Segun Arondino Croes di MEP, recientemente tabata tin un reunion den comishon fiho unda Werkgevers Vereniging Arubaanse Bouw Nijverheid (WAB), mediador di Gobierno y sindicato STA a bin pa trece nan puntonan di bista concerni e competencia inhusto den construccion y tambe cheap labor. Afuera di esaki a intercambia ariba e lei di ketenaansprakelijk cu a worde inicia pa Gabinete Oduber.
Parlamentario Arondino Croes a puntra e grupo di WAB presente si nan a puntra Gobierno ariba e proyecto di Linear Park, Caya Grandi y Rotonde na Airport.
E constesta tabata cu ora nan a bisa Gobierno cu nan ta haya cu tin competencia inhusto den prijs anto e Gobierno a contesta nan cu nan ta paga nan trahadornan demasiado halto. Ademas nan a expresa cu nan a worde masha malo mes trata door di e Gabinete Eman.
E pregunta central ta awor con ta posibel Minister di Labor Otmar Oduber ta expresa cu ta bay drecha e salario nan pa empleadonan y di otro banda ta bisa WAB cu nan ta paga trahadornan demasiado halto y cu mester reduci e sumanan aki. E maneho contradictorio aki ta desde inicio di e gobernacion di Gabinete Eman.
Parlamentario Arondino Croes ta comenta cu con ta posibel ta bisa cu desempleo ta baha siendo ta laga compania di afor bin traha na Aruba strobando e compania nan di WAB haya trabao unda cu nan si mester paga e impuestonan pa nan trahadonan. E ta un competencia hopi inhusto pa e compania nan aki cu si pa aña nan largo a inverti den diferente equipo nan costoso y mantene nan trahadornan den bon y malo.
Akinan nos ta wak e maneho di Gabinete Eman ta contra e desarrollo di nos pais unda poco poco ta haci uso di dialogo social pa tene tur hende keto y sin contenindo practico y ta laga dia pasa pa sigui biaha pa gaba na diferente pais cu Aruba tur cos ta perfecto siendo e pueblo ta sufri nan gran escala.
