Grupo di Habitante banda di Urirama ta sigui preocupa pero cu speranza Parlamento y Gobierno duna nan oido
ORANJESTAD (AAN): Posponemento di e reunion publico riba tratamento di e Proyecto Urirama a causa disgusto cerca un grupo di ciudadanonan, cu kier a sigui di cerca kico tur Gobierno tin di bisa riba e tema aki.
Junior Croes, un di e voceronan di e habitantenan di e areanan den cercania di Urirama, den un declaracion duna a splica cu a tuma nota di e decision di Parlamento, despues cu nan a anticipa e reunion pa mira cual ta e decision di Parlamento riba e tema aki.
Segun Croes, e grupo di habitante tin nan speranza bibo cu e organo aki lo duna oido na e grito di preocupacion di e barionan afecta pa e proyecto aki. Segun informacion cu a worde duna, di e cuater Ministernan cu a worde pidi pa ta presente, un di nan ta den exterior pa cual mester a pospone e reunion di ayera.
Parlamento ta den periodo pa drenta reces, pues no por a concretisa un fecha, ni si esaki lo tuma luga prome cu e reces. Croes ta bisa cu nan ta compronde cu e Ministernan tin un agenda druk, pero ta spera cu e organo di Parlamento lo por duna oido na reclamo y preocupacion di e grupo di habitante den cercania di Urirama.
E vocero a splica cu e punto mas importante pa e grupo ta e aspecto di salud, pasobra no tin ningun estudio haci riba esaki y tampoco un instancia gubernamental a atende e aspecto aki. E habitantenan di nan banda tin hopi rapport cu ta demostra cu tin consecuencia serio pa aspecto di salud. “Despues di tin añanan largo ta experimenta cu energia alternativo, mi ta kere cu a acumula suficiente informacion di diferente proyecto rond mundo.
Tin hopi reglanan mas estricto ta worde poni tur rond mundo riba proyectonan di molina.” El a duna ehempel di e proyecto di molina na Maastricht cu a worde para dos luna pasa pasobra e rapportnan a saca afo cu esnan cu ta biba na dos kilometer di e proyecto ta worde afecta den nan salud, specialmente muchanan jong. Pesey e ta spera cu Gobierno y Parlamento por duna nan oido pa atende cu e asunto aki.
Croes a bisa di ta spera cu lo no yega na e punto cu e habitantenan lo cuminsa un caso sumario den Corte. Nan ta spera cu Gobierno ta preocupa su mes pa su habitantenan y aki ta trata di un grupo grandi y hopi bario cu ta worde afecta cu construccion di e Parke di Molina. Pero mientras cu no tin un decision final, no por cuminsa un caso tampoco. Ademas cu e unico informacion cu a ricibi ta di e desaroyado Henk Hutting.
