Hoben Joey Figaroa di 16 aña a fayece den accidente cu quadracer
Chofer di F-150 a bandona e sitio lagando e victima morto atras!
ORANJESTAD (AAN): Diadomingo algun minuut pasa di 5’or di atardi un motociclista a perde control dal den baranca banda di Rococo Plaza na Tanki Leendert. Pa 5:18 di atardi Dokter Mungra a constata morto di e victima.
Segun testigonan un pickup a sali dilanti di e victima riba e quadracer cu nan a huur. E victima ta trata di e hoben Joey Andre Figaroa, naci na Hulanda dia 19-2-1996 y kedando temporalmente na Aruba na San Miguel # 28.
Joey Figaroa di 16 aña a yega diaranzon Aruba. El a bin cu su mama. E tabata studiando na Hulanda y tabata den derde MAVO. Dia 17 di Augustus hunto cu su mama e lo mester a bandona Aruba. Joey tabata unico yiu di e mama.
Joey mes ta naci na Hulanda pero yiu di mama Arubiano. El a sali den grupo di amigo pa un rond trip riba quadracer. Biniendo back cas un Pickup blanco F-150 a subi caminda su dilanti. Joey a desvia pero a pega den un palo di luz cu consecuencia fatal.
E chofer di e pickup a para parce, pero ora cu el a mira cu e victima no tabata reacciona a subi su F-150 y bandona e sitio.
Polisnan ta investigando. Mucho informacion riba number di e pickup parce cu no tabata tin. Asina mes polisnan tin un bista caba kende tabata stuur e pickup.
Por spera detencion un ora pa otro. Pa e famia sigur esaki tabata un golpi hopi fuerte. Un biaha mas forza na e famia cu perdida di nan ser keri.
