Diario Online

Kico a para cu Valero?

Publication: Friday, 13 July 2012. Categoria: General

ORANJESTAD (AAN)* Esaki ta un pregunta cu tur hende ta haciendo!! Tur cos a bira keto y ta hermeticamente sera, ni gobierno, ni parlamento y di ningun banda ta tende mucho. Loke si sa cu e trahadornan ta den incertidumbre pisa, mientras cu tin oferta di trabao y ta perde chens den e incertidumbre aki.

Banconan no ta duna credito, no ta refinancia tanten cu no tin claridad kico ta pasa. Ademas HR di Valero ta hopi activo pa kita trahador for di trabao pa cualkier infraccion cu sosode. Tin turnonan di warda sin cu tin mucho trabao si drumi of pega soño na trabao ta worde considera como infraccion y motibo di retiro.

E tension ta grandi bao di e trahadornan, na unda cu tin un grupo cu ta prefera pa e waf di container bin na San Nicolas envez cu e gobierno duna un parti di Aruba na PetroChina cu kier e refineria of tereno pa 100 aña. Ken sa si nan bin para un barco di guera den nos haf na unda cu Aruba no tin net net nada di bisa nan, ya cu pa placa gobierno a entrega nos status aparte, na unda cu no tin nada di stroba pa nan haci y deshaci riba suelo di Aruba sin cu ningun autoridad por bisa nan nada.

E hendenan aki kier bin cu 100 staff, mientras cu despues di usa trahadornan local, lo kier deshaci di nan. Nan kier bin cu nan propio polis na unda cu nan no kier nada di haci cu autoridad local. Es decir ningun autoridad local ta worde permiti pa subi tereno di e refineria. Pues nan kier crea un China chikito riba suelo di Aruba.

Di otro banda a compronde cu e documentonan ta na caminda pa parlamento na unda cu ta encera e parti di tereno cu ta parti di e refineria. Tabatin diferente conseho na gobierno pa pone e waf back bao di maneho di APA NV pa Aruba tin control riba kico ta drenta y sali y ta spera cu gobierno sali na vanguardia di interes general y cumpli cu e conseho aki.

Esta pa negocia e parti di haf cu mester keda bao di maneho di pais Aruba na bienestar di e pueblo y na bienestar di generacionnan cu ta sigui. 100 aña ta un tempo demasiado largo y aki China kier segura su presencia no solamente na Aruba sino tambe den Caribe manehando e asunto di energia.

Mester pisa kico ta cumbini Aruba, un PetroChina cu manera tin indicacion kier freehand pa haci y deshaci segun su antoho sin cu ta respeta leynan na Aruba y tin su propio manera di regla asuntonan manera su geopolitica na unda no kier worde cuestiona pa su falta di respeta derecho humano, respeta existencia di Tibet y Taiwan, mientras ta contra pa Japon haya un asiento den conseho di seguridad di UNO.

E otro pregunta ta kico gobierno ta bay entrega cu mester di aprobacion di parlamento? Y parlamento lo funciona como un stempel parlamento cu tin interes partidario prome cu bienestar y interes general na prome lugar? Lo ta interesante pa sa kico ta e puntonan di agenda di e reunion publico di parlamento den esaki.

Un cos ta sigur, no tin ningun acuerdo riba mesa, sin cu gobierno modifica e contrato na fabor di PetroChina prome. Y cuanto tempo mas Valero ta dispuesto pa wanta e trahadornan na trabao, mientras oportunidadnan den exterior ta pasa bay.