Minister presidente Mike Eman a informa OPPA riba acuerdo firma cu APFA
Logro importante pa recuperacion di e fondo di pensioen di APFA
ORANJESTAD (AAN): Diadomingo mainta Prome Minister Mike Eman a reuni cu miembronan di OPPA pa dun nan un relato amplio riba e acuerdo cu a keda firma diabierna ultimo cu APFA.
E reunion aki a tuma lugar den Renaissance Convention Center na unda Eman a subraya e balor di e acuerdo firma pa e stabilidad y recuperacion di e fondo di pensioen.
Presidente di OPPA Sr. Paul van Niel tabata masha satisfecho con cos a bay. “Tabatin mas o menos 90 miembro di OPPA presente na e reunion y tur a keda masha contento cu e informacion. E paso aki ta importante y tabata necesario”.
E plan di recuperacion ta loke a keda acorda den un acuerdo bilateral dia 26 di augustus 2010 cu a worde hancra despues den e protocol di augustus 2010 di Dialogo Social. E acuerdo bilateral aki a forma e prome paso pa e recuperacion di e fondo di pensioen di empleadonan publico. E accionnan tuma den cuadro di e prome Dialogo Social tabata esencial pa scapa un fondo cu no tabata sostenibel ni tampoco pagabel.
Prome Minister Eman a expresa cu ta danki na e reformanan cu a worde conveni hunto cu e sindicatonan, como tambe un prima fiho cu a worde paga for di 1 januari 2011, cu por mira un reduccion di e deficit, como tambe un mehoracion di e dekkingsgraad. “Bou di supervision di Banco Central, e fondo di pensioen di empleadonan publico ta bay cumpli cu un dekkingsgraad di mas di 100% na aña 2026.” Pa garantisa esaki, Gobierno como dunado di trabao lo contribui cu 3% di prima adicional.
Participantenan di e acuerdo bilateral den e Dialogo Social a conveni cu pa entrante 1 di januari 2011 ta hisa e edad di pensioen di 55 aña pa 60 aña, cambia e sistema di eindloon pa middelloon y tambe incorpora e AOV-franchise ora di calcula e base di pensioen. E curashi y sacrificio di e empleadonan publico tin un nificacion grandi: e ta refleha e sentido di madurez pa sinta hunto cu Gobierno pa resolve un riesgo grandi pa Aruba henter.
Hunto cu e cambionan menciona, a fiha tambe un prima maximo pa e proximo 15 añanan, cu ta e periodo cu Banco Central a indica cu e fondo mester recupera.
Diabierna ultimo a firma e acuerdo entre APFA y Gobierno di Aruba pa loke ta e fondo di pensioen APFA. Di parti di APFA a firma e directora señora Sheila van Veen y Ministernan Eman y de Meza di parti di gobierno di Aruba.
