Pais Aruba ta worde mira como ehempel riba nivel di turismo y aviacion civil
Minister Otmar Oduber :
ORANJESTAD (AAN): Diaranson mainta Minister Otmar Oduber a ricibi bishita for di Minister Romeo Pantophlet di Sint Maarten pa dialoga riba tereno di turismo y servicio aereo di Sint Maarten.
Minister Oduber e mandatario a expresa cu e relacion entre Aruba y Sint Maarten ta uno importante y cu Minister Pantophlet tabata sumamente interesa den e proceso cu Aruba a hiba pa loke ta trata e independisacion di oficina di turismo, ATA.
Conseho di Ministro di Sint Maarten a dicidi pa Minister Pantophlet acerca Aruba y Minister Oduber pa dos punto di agenda cual ta oficina di turismo, mirando cu e modelo cu Aruba a scoge pe y e caminda cu a worde cana ta uno ehemplar unda cu Sint Maarten kier sigui e mesun pasonan, y e topico di aviacion civil.
Minister Oduber a bisa di ta sumamente orguyoso di mira con e trayecto cu a worde cana pa e ultimo 2 añanan ta worde reconoci mundialmente.
Mirando cu Sint Maarten tabata mara anteriormente na Curaçao, y e downgrade cu Curaçao a conoce den categoria den nivel di aviacion civil, Minister Pantophlet a pidi pa Aruba su sosten pa asina e por logra bay back den e categoria cu e tabata conoci anteriormente.
Minister Oduber a bisa cu Aruba ta bay duna tur sosten na Sint Maarten den turismo y transporte aereo, mirando con Aruba ta worde mira como ehempel den nos region.
Aruba su oficina di turismo na e momentonan aki tin un reserva cu a worde crea pa momentonan di dificultad, su entradanan ta completamente independiente for di Gobierno aunke si ta sigui e maneho di Gobierno y cu ta duna resultadonan positivo mirando e raportnan di Banco Central, e cantidad di turistanan y hotelnan cu ta bende nan cambernan na un miho tarifa. E resultadonan aki ta worde mira door di otro paisnan, caminda cu no ta solamente Sint Marten a pidi conseho for di Aruba, pero tambe entre otro Suriname.
Minister Oduber a expresa cu esaki ta duna un sentido di orguyo pa Pais Aruba di mira con nos ta worde mira como ehempel den e region.
