Premier Eman ta splica cu ta un proyecto integra den un totalidad y no un proyecto fragmenta
Proyecto na Diamantbergweg a cuminza:
ORANJESTAD (AAN) – Den entrevista cu Matutino DIARIO, señor Herbert Coco cu a worde designa pa atende cu e proyecto di renovacion di viviendanan na Diamantbergweg y vecindario, a elabora tocante dicho proyecto.
Señor Coco a menciona cu nan a bishita varios di e casnan aki y a inventariza e necesidadnan pa haya un idea di e situacion social di e habitantenan, y a wak den ki estado tecnico e casnan ta.
Asina aki nan lo haya un indicacion di cuanto cas lo por keda manera nan ta y cuanto lo mester worde renova, cuanto mester di mantencion y cuanto no.
Señor Coco a subraya cu mester tene cuenta cu hopi di e habitantenan di e casnan ta propietario y nan ta den un edad halto y mester wak con pa haya un solucion pa financia nan. Otronan ta doño di mas cas cu sea mester worde basha abao of renova.
Kiermen, tin diferente situacion cu F.C.C.A ta analizando pa wak con por yega na un solucion mas agradable cu tur hende lo por biba cune.
Señor Coco a subraya cu e recepcion di e habitantenan tabata bastante bon, nan a habri e casonan pa por drenta y wak e situacion y incluso nan a conta parti di e historia di e bario y kico nan kier haya back den dje, cu nan tabata tin antes, y tur esaki ta worde poni den e rapport cu F.C.C.A ta trahando aworaki.
Señor Coco a agrega cu tin di e habitantenan aki cu kier pa e bario haya e nomber original back, cu ta Rooi Hundo, tin di nan cu ta desea pa bin cu areanan di recreacion y lugar unda nan por sinta wak e bunita bista cu tin eynan. Tur esaki lo worde incorpora den e proyecto dossier cu F.C.C.A ta bezig cune.
Prome Minister mr. Mike Eman a agrega na e palabranan di sr. Coco, cu e prome parti cu ta bay worde traha ta e infrastructura, esta recap e bunita caminda cu ta bin di ariba bin abao, y tambe lo adapta facilidad pa hendenan por cana, pasobra aworaki ta hopi peligroso pa haci esaki.
DIP a haci un bon diseño di con por mehora e caminda aki hunto cu un parti pa e peaton por cana safe, y tambe e diferente colornan pa distingui e caminda pa auto core y esun pa hende cana, lo haci e bista hopi mas agradable.
E dignatario a señala cu lo wak e posibilidad pa duna e bario su nomber original back pasobra enberdad tin un rooi hopi hondo y atractivo den e area aki.
El a compara e sector aki cu Bakval y Malmok, pa su buniteza. Premier Eman a bisa cu ora haci e rooi aki limpi, sigur e lo bira un atraccion turistico tambe. El a agrega cu tin pensamento pa hunto cu Marina di Aruba lo por traha un brug cu por bira hopi atractivo pa nos mes hendenan y pa e turistanan, y tur esaki ta den e plan di desaroyo.
En todo caso e proyecto a cuminza, e contacto di FCCA cu e bario a inicia, e prome oficina lo worde traha den forma di un cas, pa despues e bira habitable tambe y pronto lo ehecuta e caminda tambe.
E dignatario a subraya cu gobierno a haya bon cooperacion di DIP, cu tambe ta mira con por tuma henter un area asina y integr’e pa e bira un totalidad hopi bunita cu no ta partinan fragmenta cu ta bay worde renova, sino algo completo, y gobierno ta masha contento cu e proyectonan aki, Premier Eman a remarca.
