Sarah-Quita Offringa ta retene su titulo di campeon na Fuerteventura
ORANJESTAD(AAN): Sarah-Quita Offringa, compitiendo bao di e registro di ARU-91, di 21 aña di edad ta logrando di retene su titulo di campeon den e PWA Freestyle World Cup 2012 cu a cuminsa desde dialuna ultimo na Fuerteventura na Islas Canarias na Spaña.
Diabierna ultimo el a logra retene su titulo di campeon den “Single Elimination” y riba diadomingo el a retene su otro titulo di campeon den “Double Elimination” den windsurfing.
Tres siman pasa Sarah-Quita Offringa a bula for di Hulanda pa Spaña, unda el a cuminsa train pa e campeonato mundial aki. Cu e titulo di e weekend aki, esaki ta bira e di 5 aña consecutivo cu e ta ganando. Ta con pa bisa cu desde aña 2008, Sarah-Quita nunca mas a perde un “heat” den e competencianan cu e ta participa, esta den e categoria di “Freestyle” di hende muher.
Sarah-Quita Offringa di 21 aña di edad ta midi 1.82 meter di haltura, ta pisa 72 kilo y ta residenciando na Utrecht desde aña 2010. Ey e ta studiando pa “ciencia y maneho di innovacion”. Si tur cos sigui bon, otro aña e lo logra su titulo di “bachelor” y na aña 2014 e lo termina cu su estudio na nivel di “master”. E deporte di windsurfing, cu e ta dominando awor na nivel internacional, e ta haci banda di su estudio.
