TIN BISTA RIBA LOCUAL A SOSODE DIA CU POLIS A TIRA COLOMBIANO MATA
Segun Fiscal Mayor,
Specialista di Hulanda lo haci extra investigacion di hechonan
ORANJESTAD (AAN): Recientemente prensa a puntra Fiscal Mayor Peter Blanken tocante e hecho cu supuestamente famia di e Colombianonan cu a worde tira mata pa polis algun tempo pasa den Oranjestad, lo a cuminza un caso contra O.M.
Blanken a bisa cu e no tin un idea di esaki.
El a bisa cu el a tende si cu nan lo a acerca corte penal internacional.
Prensa a puntra Blanken kico mas e por bisa tocante e caso.
El a splica cu tin algun investigacion den cual bo por duna algun informacion y den algun caso bo no por haci esaki.
Den e caso aki locual e por a bisa di e caso di tiramento di 22 di Februari ta cu door cu ta polis ta envolvi, landsrecherche tabata ocupa cu un investigacion di locual a sosode.
E investigacion di e hechonan a keda cla y awor tin un bista di locual a sosode riba e dia en cuestion.
Loke awor ta bay sosode ta cu un specialista di Hulanda tambe ta bay haci un extra investigacion di e hechonan.
E experto aki lo bay bisa algo despues di con un Arestatie Team (AT) tin cu actua.
E ta bay duna un splicacion riba entre otro con e proceduranan mester ta.
E investigador aki ta bay evalua locual a sosode na Aruba, pa asina tuma medida y duna sugerencianan pa den futuro baha e cantidad di riesgo cu por tin den casonan asina.
Esaki segun fiscal mayor Blanken, kende a sigui bisa cu semper ora AT drenta den accion, tin algun riesgo y pesey mester tuma medida pa baha e riesgo.
E experto ta di Rijksrecherche di Hulanda, kende a haci varios di e tipo di investigacionnan aki.
El a yega di duna opleiding na miembronan di AT di Aruba na Curaçao.
Si tur cos ta bon e investigacion lo cuminza otro siman, pa e ora ey dentro di algun siman e keda cla.
DIARIO a puntra Blanken di despues die investigacion tin chens cu algun di e agentenan di AT por worde persigui penalmente of si nan por worde disciplina y el a bisa cu despues cu e investigacion ta full cla, e lo por bisa mas.
Ora cu Blanken a worde puntra si e miembronan di AT envolvi den e tiramento ainda ta activo como AT, el a bisa cu e no por comenta riba esaki.
