Wubbo Ockels kier diseña un auto completamente duradero pa Aruba
ORANJESTAD (AAN): Un auto ‘green’ y special pa Aruba. Esaki ta un di e metanan cu e profesor di energia duradero sr. Wubbo Ockels tin pa Aruba, den cuadro di su proximo estadia di tres luna na Aruba.
Esaki el a divulga awe durante e programa di radio Hulandes ‘Vroege Vogels’. Sr. Ockels a worde invita den e programa aki, pa asina conta un poco mas di e acuerdo cu el a firma siman pasa cu Minister President Mike Eman.
Ockels lo sali for di Hulanda den su boto Ecolution na luna di november rumbo pa Aruba. Aki e boto Ecolution lo mara na waf di Oranjestad, practicamente dilanti bestuurskantoor. Durante tres luna sr. Ockels lo yuda cu e realisacion di e ambicionnan di gobierno di Aruba pa un Aruba duradero. “Ora tin reunionnan di e topico duradero, nos por tene esakinan riba Ecolution. ” Ex-astronauta Ockels ta mira den Aruba, un ehempel pa henter mundo, pero principalmente pa e propio Hulanda. “E circumstancianan na Aruba ta ideal pa por bira completamente independiente di combustibel fossiel. Tin suficiente biento, solo y awa di lama frieuw. Pero ainda e proceso mester cuminsa. Pa por yega na e meta aki, mester di liderazgo. Aki nos no ta papia di intercambio di opinion, pero di un vision cla pa futuro y esaki ta loke Minister President sr. Eman ta posee.”
Sr. Ockels den e programa di radio a conta cu su intencion ta pa traha principalmente riba e receptividad di e pueblo Arubiano. “Un Aruba duradero no solamente ta yuda haci e isla mas limpi, pero na mes momento e mester ta algo placentero tambe. Awendia e pueblo di Aruba tin gastonan halto cu coriente, na mesun momento e isla ta worde contamina tambe. Nos por ofrece nan un alternativa cu ta mas barata y limpi. Esaki alavez ta bon pa turismo di Aruba. Ta asina cu un isla duradero ta atrae mas turista. Aruba lo bira un happy energy island”. Un ‘Eco-mobiel’ Arubiano, un auto 100% duradero, ta perfecto den e proceso duradero aki. “E caracter Arubiano mester worde representa den esaki.” Segun Wubbo Ockels.
E entrevista completo por worde scucha riba www.vroegevogels.vara.nl
