Agente policial envolvi den desgracia riba caminda di Tanki Leendert
ORANJESTAD (AAN): Diaranzon atardi algo pasa di 5:30 pabou di Texaco Tanki Leendert net dilanti Axxion Auto Parts a sosode un accidente cu cuater vehiculo envolvi y tres persona herida.
Polis, Unidad di rescate di Cuerpo di Bombero y tres di Ambulance a mobilisa mesora pa ofrece ayudo.
E Suzuki Grand Vitara cu number A-28294 a subi caminda no a mira Nissan 350Z cu number A-48958 biniendo for di pariba riba velocidad halto.
E impacto tabata fuerte e Grand Vitara a perde control dal den un Toyota Highlander cu number A-47377 y finalmente bay dal den un truck di sushi di Serlimar cu number D-496.
E auto deportivo 350Z a purba di evita e impacto pero sin exito a bay caba te dal den cura di cas. E porta di Nissan a keda destrui y su chauffeur abordo herida no por a sali. A rekeri bomberonan pa forza e porta pa asina por saca e victima masculino y transporte pa Hospital.
Ta trata aki di un Agente Policial di fam G. Airbags a scapa e chauffeur aki di heridanan hopi mas serio. E otro chauffeur di e Vitara cu a bay dal den dos vehiculo tambe tabata herida pero no ta mustra di gravedad.
Personal di Ambulance a trata un di tres victima pa heridanan leve. E Grand Vitara y Nissan 350Z a keda total loss. Polis a tene e caminda bon cera pa casi un ora. Specialista di trafico a yega e sitio pa realisa un investigacion di e desgracia aki.
