Un cordial pabien na nos ministro presidente y su coleganan
Nos pueblo por ta hopi orguyoso di tin un gobierno cu ta cumpli debidamente cu su promesanan haci den campaña contrario na loke nos por a mira di gobernacion di MEP. Cosnan sumamente grandi ta worde haci door di e gobierno di AVP y nos ta convenci cu nos pueblo ta mira e diferencia cu tin entre e dos gobiernonan.
Ya di biaha na initio di e gobernacion nobo por a mira un sistema di traha serio cu e gobierno nobo tabatin. Nunca mag worde logra kico MEP a laga atras cu e gobierno di AVP mester a bin drecha.
E daño di mas grandi tabata e hecho cu MEP y muy en particular Nel Oduber mes a cera e refineria. Valero a splica e gobierno di MEP detayadamente cu si no kita e BBO for di e compania aki e lo mester cera. Mescos cu e gobierno a haci cu Valero cu door di esey a stop su operacion MEP a haci cu KLM y Carnival Cruises.
Nos ta considera e obligacion di nos tur cu ta stima nos isla pa keda corda nos pueblo ariba e desgracia cu MEP a pone nos pais aden. Awe nos por hala un rosea grandi di alivio ora nos mira con e gobierno di AVP ta trahando.
Un cambio enorme den manera di goberna nos ta mira tur dia y awo cu e acuerdo cu a yega na dje den e Dialogo Social henter nos comunidad ta bay experienica e cambionan aki.
Un compliment mester bay muy en particular na nos ministro presidente cu atrobe a mustra su capacidad unico pa por a yega den e temponan aki pa uni tur organsiacion den un Dialogo Social pa pone henter nos comidad unanimamente carga e decision di peso hopi halto.
E lista di e logronan di nos ministro presidente Mike Eman ta birando hopi largo y ta duna cada Arubiano tambe esnan cu ta MEP un sinti di orguyo profundo. Hopi di nos famianan ta pasa den cambionan hopi positivo compara cu antes y nan ta mira cu nos gobernantenan ta dedica tur nan atencion na mehora e calidad di bida di muy en particular esnan mas dependiente den nos comunidad.
E ultimo logro den e Dialogo Social cu e tarifanan di awa y coriente ta bay baha ta algo cu masha poco hende a kere lo por worde logra. Cuanto biaha politiconan di MEP no a priminti cu lo baha e prijs di awa y coriente. Cuanto nos no a tende e dirigentenan di MEP critica e gobierno di AVP cu a priminti di baha e tarifanan di awa y coriente.
Algo grandi a sosode na Aruba cu sosten di henter nos comunidad. Organisacionnan di dunador di trabao y di trahador hunto cu gobierno a concentra nan mes conhuntamente ariba e situacion dificil di hopi di nos hogarnan pa motibo di e tarifanan di awa y coriente y logra pa yega na e pasonan importante na bienestar di tur nos hendenan.
Nos pais por ta chikito pero ora nos tin gobernantenan cu tin e vision y e determinacion basa riba idealnan y principionan, nos pais ta grandi. No solamente na Aruba mes e gobernantenan ta haya reconocimento pa un tremendo trabao pero tambe pafo di nos isla e gobierno di Aruba ta hayando un respet grandi. Den corto tempo ta logrando di saca Aruba for di e direccion di disaster den direccion di progreso atrobe.
Y progreso pa tur nos hendenan y no pa un grupo di top di MEP so. Rond Aruba tur nos hendenan ta sinti cu un bon gobierno ta pone cu tur riba nos isla cosecha di esaki. Pesey un biaha mas nos mester enfatiza cu nunca mas MEP mester por drenta den gobierno di nos isla.
Awo nos por mira con un ministro presidente di Aruba cu tur atencion na e interes di nos pueblo por logra cosnan sumamente grandi. Pesey nos ta kere cu palabranan di pabien ta na su luga.
Logronan hopi importante pa henter nos pais ta resultado di e enorme dedicacion cu nos ta mira di nos ministro presidente y su coleganan ministro. Pabien y sigui asina!
