Arubahuis ta sigui e desaroyonan rond di e asina yama langstudeerboete hopi di cerca.
ORANJESTAD (AAN): Arubahuis ta sigui e desaroyonan rond di e asina yama ‘langstudeerboete’ hopi di cerca. E situacion aki a bira aun mas confuso awor cu a resulta cu un mayoria amplio den Parlamento hulandes a declara di ta contra e medida aki.
E ley aki lo mester drenta oficialmente na vigor entrante 1 di september proximo. Tur studiante cu tarda mas di un aña pa termina su estudio, lo worde multa 3000 euro extra ariba e suma di matricula.
Un inventarisacion conduci pa e Departamento di Enseñanza di Arubahuis ariba e impacto di e medida aki a conclui cu centenares di studiante lo worde afecta debi na su introduccion cu forza retroactivo. Ta pesey tambe a percura pa spierta e studiantenan for di trempan encuanto e medida aki y su consecuencianan.
E preocupacion ta existi cu un cantidad di studiante lo confronta problemanan financiero serio. Otronan lo scohe pa e motibo aki di bandona nan estudio prematuro. Institutonan di Enseñanza na Hulanda a anuncia ya caba cu miles di studiante a stop cu nan estudio.
Ta calcula cu entrante 1 di september mas o menos 50.000 studiante lo worde confronta cu e efectonan di e ‘langstudeerboete’.
E introduccion di e medida aki tabata parce irreversible na momento cu huez a dicta fayo den e caso entama pa e sindicato di studiantenan. Na vispera di e eleccionnan pa Tweede Kamer di dia 12 di september proximo, mester constata sinembargo cu e base di sosten pa e medida aki a disminui. Inicialmente tabata e partido di gobierno VVD cu a laga sa di no ta sinti nada pa e medida aki mas, y awor ta e partner di coalicion CDA ta esun cu tambe ta rechasa e medida.
E partido GroenLinks a entrega un peticion pa interumpi e periodo di reces, pa asina Tweede Kamer por trata un proposicion di anulacion di e medida promer cu dia 1 di september.
Departamento di Enseñanza di Arubahuis lo sigui monitor e desaroyonan di acerca y lo tene nos studiantenan debidamente informa.
Tur studiante ta worde recomenda ademas pa consulta e website di Dienst Uitvoering Onderwijs (www.duo.nl) regularmente.
