Dialogo Social y reduccion di prijs di awa y coriente
ORANJESTAD(AAN): Dialogo Social ta un metodo di negociacion caminda ta yega na solucionnan concreto pa problemanan di peso y importancia grandi pa nos pais. E palabra clave den henter e proceso aki ta “Dialogo”.
Awe ta asina leu cu Gabinete Mike Eman hunto cu Gremionan sindical y comercial a cuminsa un proceso di dialogo riba e prijs di awa di coriente en general na Aruba.
Aruba a conoce caba un cantidad grandi di problemanan di naturalesa structural cu a haya nan solucion na mesa di Dialogo Social.
Aki por pensa por ehempelnan riba tereno financiero, social y economico. Pero un di e logronan di mas grandi cu Dialogo Social a yega di pone dilanti ta e hecho cu a logra baha e precion di un manera structural riba e fondo di pension APFA. Aki por a corda tempo cu banda di a yega na e logro ey, tambe a baha salario y pension di “politieke ambtsdragernan”.
E ultimo aki ta referi na Minister y Parlamentarionan cu mester a entrega parti di nan entrada pa motibo di e dialogo di e tempo ey entre gremionan sindical, comercial y gobierno. E liña grandi tras di henter e proceso actual di Dialogo Social aki ta pa cuminsa pa kita e necesidad pa baha of te hasta elimina e dependencia di gobierno riba dividendo di e dos companianan di ultilidad aki cu ta WEB Aruba NV y NV Elmar.
For di hopi skina den nos comunidad esaki ta un idea cu ta cay den bon tera, pasobra hopi ta considera e dividendo y impuesto di ganancia riba e dos companianan aki manera un “verkapte belasting”. Di otro banda ta poniendo hopi enfasis riba e hecho cu e calidad di e producto cu e dos companianan aki ta provee, no por sufri, garantisando asina e pueblo di awa di calidad y coriente stabiel.
A pone hopi enfoke riba e necesidadnan cu e dos companianan aki mester pa por mantene te hasta por mehora e servicio cu nan por duna na pueblo di Aruba. E prijs di combustibel, Heavy Fuel Oil, cu ta worde uza pa asina por produci tanto coriente y awa, ta keda un preocupacion.
Tin hopi trabao ta worde haci pa wak con por soluciona esaki di un manera mas eficiente cu ta posibel. Un otro aspecto cu ta haciendo e pronostico di companianan aki dia pa dia menos dependiente di Heavy Fuel Oil ta e introduccion molinanan di biento. Cu introduccion di mas di e productornan aki di energia, por spera menos efecto di brandstofclausule riba e prijs di awa y coriente.
Na final di e Dialogo Social, cu ta planea pa aki algun siman, mester sali un consensus di con lo carga e solucion den un forma caminda cu un y tur envolvi por sostene.
