Home Editorial Editorial: “Show” y “Kibramento”!

Editorial: “Show” y “Kibramento”!

1
0
SHARE
- Advertisement -

                En realidad mi tin hopi aprecio pa e integrantenan di e Gobierno actual, cu un solo excepcion: Dowers! Esey, den mi concepto, no ta pas den e conhunto di Ministronan cu ta haciendo nan best pa crea e prosperidad general cu Aruba ta reclama di su mandatarionan. E ta un Ministro cu tin of a haya problema den casi tur su departamentonan, y definitivamente no ta un persona di palabra! Pero, e resto di e Ministronan, un mas cu otro, ta haciendo loke nan por cu un situacion nada facil pa maneha o coregi.

                E titulo di e editorial aki ta papia pa su mes, ya cu nos tur ta consciente di e gran “show” cu ta tumando lugar, acompaña pa fotonan na granel cu tur clase di personahe den exterior, y na Aruba cu cualke cos cu no merece ni sikiera un mencion, pero ta ser exagera sin misericordia.

Djey ta bin e “kibramento”, y pa bisa berdad, mi ta kere cu no a keda un solo caya na Oranjestad cu no a haya e bishita di tractornan o cualke otro makinaria pisa cu a destroza nan, y otronan cu a haya un cambio di direccion di trafico dificil pa compronde. Por fin nos a mira e instalacion di algun riel, o spoor, o con otro cu bo kier yama nan, y nan ta incrusta den loke tabata e asfalt di Caya Grandi, sperando ansiosamente e yegada di un trein o tram o trolley, atrobe con cu bo kier yame, cu mester yena un bashi cu no ta existi, y cumpli cu un razonamento cu no ta comprendible. Mi no tin nada contra e trein, pero for di un principio e no a convencemi cu e tin algun sorto di utilidad pa Pueblo o pa Aruba. Sin embargo, ata e trabaonan di preparacion pa su yegada ta sigui, y e stress ta birando mas grandi cerca e chofernan cu mester soporta cambionan cu ta pone nan den un atraso iremediable den nan mision di yega unda nan mester bay, y bolbe for di unda nan ta bay ta.

                Di e refineria nos no a bolbe tende algo mas, pero ta sigui confia cu e ta bay habri, aunke den man di e cumpradornan Dios sa kico ta bay pasa den futuro cu e Aruba cu nos a conoce y ta semi-conoce awendia. Hopi cos a cambia cu e yegada di un oleahe di stranheronan, mayoria di kendenan ta hendenan drechi cu ta contribui na e progreso di nos isla, y ta bonbini, aunke tin otronan cu no ta porta nan mes adecuadamente y ta crea den Pueblo un tipo di resentimento cu e ta controla cu hopi tolerancia.

                Riba tereno politico nos no ta mira nada extravagante sosode, y ta parce cu nos a cay den un status quo di repeticion cu tin hopi di nos cansa. For di e partido den Gobierno nos ta tende e mesun tono casi tur dia, y cu ta birando monotono, pero di otro banda nos ta mira un MEP cu ta reorganizando su mes hopi bon y ta bay ta e gran sorpresa pa esnan cu a pretende di dere prematuramente. Evelyn ta haciendo su best den un situacion interno cu a gare di sorpresa, pero cu el a sa di enfrenta cu curashi y sentido comun. Berdad ta cu el a perde un par di baluarte, pero den e filanan di e partido tin hopi cla y dispuesto pa reemplaza nan cu exito.

                AVP ta sigui di ta e partido pa vence den e proximo eleccion, y integrantenan manera Mike de Meza y Otmar Oduber lo percura pa e acumulacion di votonan cu e partido tin mester pa mantene su mes den poder. E lo por logra ripiti e hazaña di e eleccion anterior? E ta posible, pero mi ta duda masha hopi den e repeticion ey, aunke den politica ta dificil diferencia entre loke ta posible y loke ta probable. Di un cos mi ta sigur: Andin ta bay crece hopi, y e por resulta e figura lider di un partido cu ta bay tin algun sorto di influencia den e formacion di e proximo Gobierno.  Esey no ta dificil pa pronostica for di awor caba, pero pa loke ta e eleccion mes, ta dificil adivina e resultado final. Mi ta spera cu e “show” por yega su fin pronto, y cu e “kibramento” lo siguie pa e trankilidad di nos tur. Ya ta basta cu tanto trabao pareu, sin cu por a mira te awor e conclusion rapido di maske ta un par di e importantenan.

 

- Advertisement -

DUNA COMENTARIO

Please enter your comment!
Please enter your name here