Gobierno actual no ta stigmatiza esnan den necesidad manera Gobierno anterior tabata haci
Segun Prome Minister Eman,
ORANJESTAD (AAN): Durante un conferencia di prensa di Gobierno, un miembro di prensa a bisa Prome Minister Mike Eman, cu e no ta di acuerdo cu e ponencia di Prome Minister, kende a bisa cu Gobierno anterior su maneho pa loke ta esnan cu ta cobra bijstand, quizas no tabata un bon maneho, mirando cu Gobierno anterior su ponencia tabata cu entre otro cu mester duna e hendenan un liña di pisca y siña nan con pa pisca, en bez di keda duna nan un ayudo financiero.
E miembro di prensa a bisa Prome Minister cu e maneho di Gobierno anterior tabata mescos cu esun di Hulanda, cu tabata enfoca riba purba laga e hendenan bay school back pa asina nan por purba den otro ramo di trabao.
Prome Minister a bisa cu Gobierno actual ta full dia cuerdo cu locual na Hulandes ta worde yama ‘her- , om- en bijscholing’ y Gobierno actual ta implementa esaki tambe.
“Locual nos no ta haci ta stigmatize esnan cu ta den un necesidad pa haya un asistencia social”.
“Nos no ta descualifica nan den un forma verbal”.
“Nos ta dunando te hasta mas oportunidad pa un persona asina por Sali for di e circulo vicioso cu e tin, cu henter e proceso cu nos a introduci di DPL, unda cu nos ta registra hendenan desemplea den un manera hopi mas sistematico y nos ta intermedia na un manera hopi mas sistematico pa nan por haya un trabao”.
Esaki segun e mandatario, kende a sigui bisa cu Minister di Labor a duna hopi atencion na Enseñanza pa Empleo, unda cu bo ta wak cu e cursonan a aumenta, mientras cu e cursonan cu ta worde duna ta hopi dirigi riba e mercado laboral.
“Mi ta kere cu nos ta duna hasta mas atencion cu Gobierno anterior, na her-, om-, en bijscholing”
“Locual si nos no ta haci ta stigmatiza esnan cu ta den un necesidad di un ayudo social y pinta nan como si fuera nan lo ta haci algo malo, cu nan tin cu bay pisca etc.”
Esaki segun Eman kende a sigui bisa cu tabata tin un actitud general pa esnan pober den nos comunidad cu no tabata trata e hendenan cu e dignidad cu nan tabata merece.
El a sigui bisa cu e actitud ey di parti di Gobierno anterior no tabata solamente dirigi riba esnan di menos recurso den nos comunidad.
“Nos a tende e mesun sentido di falta di comprension aki pa cu stranheronan den nos comunidad, unda cu te hasta a worde bisa: ‘bay bo pais’”.
“Ora nos a tende nos Prome Minister anterior papia di nos grandinan y nan organizacion OPPA y tambe contra personanan cu por ehempel tin un handicap, esaki di berdad ta algo pa cuestiona”.
Esaki segun Eman kende a sigui bisa cu awor cu e actitud di Gobierno actual si ta mas positivo, tin mas hende cu quizas ta busca bijstand.
“Si door di actitud positivo di e Gobierno aki, 1 of 2 hende mas busca bijstand, mi ta drumi mas trankil, pasobra nos gobernacion ta cumpli cu hendenan den necesidad”.
Esaki segun e mandatario kende a sigui bisa cu no ta e intencion si pa stimula mas hende busca un ayudo social, sinembargo Gobierno no ta stigmatiza e hendenan cu di berdad tin mester di e ayudo social.
