Diario Online

Gobierno ta preparando su mes pa demanda di presonan

Publication: Thursday, 2 August 2012. Categoria: Judicial

ORANJESTAD(AAN):Tin un grupo di preso a dicidi di hiba pais Aruba Corte pa motibo cu no ta cumpliendo cu nan derechonan den KIA.

Relaciona cu esaki a combersa cu esnan den gobierno kendebab a cuminsa pa splica cu nan ta respeta derecho di tur hende pa bay busca nan derechonan den Corte, aunke cu nan ponencianan no ta cuadra totalmente cu realidad.

Gobierno ta bisa cu e ta prome pa admiti cu e prison no ta e luga mas placentero, treciendo limitacion pa esnan cu ta eyden. Di otro banda e prizon ta existi pa hopi aña caba, y ta trece su retonan cune. Esaki ta encera cu den e proximo presupuesto mester pone placa disponibel pa realisa un bon mantencion, cu e por sigui wordo uza pa algun aña mas. Sinembargo e mester bisa na mesun momento cu e prison no ta di tal indole cu no por mantene hende cera eyden.

E ponencia di e presonan ta cu nan no ta haya suficiente recreo. Mando ta percura pa duna esaki mas tanto posibel y te unda cu nan capacidad ta permiti esaki. Lamentablemente tin cierto presonan mes cu ta hacie dificil pa por cumpli cu un bon servicio, door di no contribui of comporta na altura di un situacion cu ta sigur pa e prison. Esaki ta haci cu mester tin mas personal pa por duna nan e recreo necesario, cual ta trece cune cierto limitacionnan. Pues e situacionnan cu ta wordo crea internamente ta haci cu mester limita e parti di recreacion gobierno a enfatisa.

Gobierno ta recorda cu den pasado caba tabata tin un caso caminda Hues a pone cual ta e condicionnan minimo cu mester cumpli cune den prizon y ta cumpliendo tambe cune. Loke presonan a keha di dje den pasado tabata cu nan ta mucho hopi den un camber chikito, pero Hues a bisa cu si tin suficiente recreo, esey no mester ta un problema. Ya caba tin un grupo di personal nobo den opleiding. Asina cu nan cuminsa traha, lo tin posibilidad pa mas recreo y otro tipo di distraccion den prison. Nan a keha tambe cu awa ta drenta nan cel, cual ta un ponencia cu gobierno no por compronde, pasobra awa no ta yobiendo den e temponan aki. Despues di e prome caso den Corte, a haci inversionnan cuantioso pa evita cu awa ta drenta e celnan. Ta momento cu awa yobe hopi duro por mira si e trabounan haci a duna resultado. E afdaknan cu a wordo traha dilanti di e cambernan di prison, a pone cu no por a hinca e placa den otro cosnan pa KIA, y cu a haci cu a keda cu cierto limitacionnan. Pues den e siguiente presupuesto lo pone placa pa haci otro cosnan den e instituto. Hecho ta cu tin un miho condicion cu algun aña atras. Pero no mester lubida cu e prison aki ta construi 20 aña pasa y no por para banda uno nobo p.e. di Hulanda.

Gobierno a enfatisa cu nan ta haciendo “yamada” na esnan cu kier bira cuidador di preso pa bay den un opleiding, sinembargo e no ta algo cu por cumpli cune di un dia pa otro. El a recorda cu den pasado KIA a wordo amplia, sinembargo nunca a percura pa suficiente personal. Ya caba a logra cuminsa cu un grupo di 25 persona, y ta buscando pa logra otro dos grupo mas pa por cumpli cu e demanda. E problema ta pa haya hende traha na KIA, debi na e peliger y ademas e screening cu mester pasa den dje ta uno basta complica. Den e procedura ey ta uno caminda hopi persona ta cay afo, pasobra e aspecto sicologico, fisico, y antecedente ta hunga un rol importante. E ta keda un reto, aunke ta reclutando persona pa e siguiente opleiding.

Un prizon na un otro localidad no ta den pensamento inmediato. E condicionnan di KIA no ta esun mas adecuado, debi na erosion. Na mesun momento ta puntra su mes ta con a construi e luga sin a otro parti di mundo ta construyendo brug hasta den lama. Mester tin algo malo den e construccion, pasobra mester por mantene un luga den e area ey. Un otro localidad ta dificil pasobra no tin otro luga disponibel. Simplemente mester mantene y sigui desaroye.

Pa loke ta siguridad den KIA, gobierno ta bisa cu e reto mas grandi cu tin den KIA y tur prison na mundo ta mantene un siguridad optimal. No tur ora esnan responsabel, ta logra. Pero e ta keda un reto grandi, ya cu e no ta un cos facil, pasobra hopi esfuerzo ta wordo haci door di criminalnan pa kibra e bareranan di seguridad. Pesey no mester bagatelisa e esfuerzonan cu ta wordo haci door di grupo grandi di persona.