Hopi atencion pa e test pisa awe riba cambio di trafico dilanti Aeropuerto
ORANJESTAD (AAN): Awe lo ta e dia pa mira con cortico e pasenshi di chofernan lo ta, ora cu gran parti di automobilistanan lo bay purba pa prome biaha, pasa den e desvio temporal cu DOW y Polis a crea, relaciona cu e trabao di construccion di Rotonde di Spiral dilanti Aeropuerto di Aruba.
Riba Diadomingo a haci e cambionan, y a cera e caminda. Inmediatamente tanto Polis y DOW a bin descubri loke hopi hende sa di antemano pa cual un Rotonde ta conoci pe:
“Riba un rotonde, semper e vehiculonan dominante cu tin preferencia lo sigui core y esnan na banda mester djis keda warda”.
Precisamente esey a socede na e “mini-rotonde” nobo cu a worde crea na altura di e Restaurant Chines pariba di Aeropuerto.
Trafico di San Nicolas ta dominante. Trafico di Oranjestad ta dominante. Pues autonan cu ta sali for di Wayaca… y trafico cu ta sali for di Aeropuerto… tin di keda warda.
Warda, warda, y warda.. te cu e rij di auto ta stagna dilanti Aeropuerto, obstaculizando Taxistanan na gran cantidad.
Mainta lo no tin problema, pasobra Aeropuerto casi no tin vuelo. Pero atardi lo ta otro asunto.
Diadomingo a mira tambe, cu algun vehiculo grandi tin dificultad pa pasa riba e “rotonde miniatura” ey. Awe cu ta Dialuna y cu hopi vehiculo pisa lo pasa e caminda aki, lo bay wak con e lo bay stagna.
Un advertencia na esnan cu ta pensa di bay pasa e caminda di “patras”, pues via Parkietenbos, keriendo cu e lo sali mas liher. Riba Diadomingo esey a demostra di no ta e caso, pasobra bo ta bin finaliza hunto cu e trafico saliendo di e Terminal di Aeropuerto, y bo ta keda mal pega.
Chofernan cu ta bin di San Nicolas, ta worde suplica pa observa e borchi bon. Djis subi e rotonde y bay straight pabao, y sigui borchinan pa asina bo subi caminda bek. Solamente si bo kier bay Cumana, bo por cuminza tuma e ruta pa pasa via di Wayaca.
Pero ya caba trafico a bira pisa door di Wayaca, y riba Diadomingo atardi ya e prome accidente a keda registra riba e caminda.
Esnan cu ta bin di Playa y cu ta bay pa San Nicolas, lo mester baha banda di Brandweer y core riba e caminda nobo temporal. Ora bo yega na Aeropuerto, bo tin di sigui core bay pariba te na e rotonde nobo.
Un biaha mas, e pregunta ta bin dilanti. DOW ta sigui kere cu “Rotonde” ta e “Palabra Magico” pa tur solucion di trafico. Siendo cu tin varios hende, cu a yega di mustra claramente, cu un “Brug/Viaducto” riba e caminda aki lo a yuda mucho mihor envez di un Spiral Rotonde.
Awe ta un dia cu esnan di DOW, y Gobernantenan lo bay haya critica bay goal. E lo empeora ora cu Aña Escolar start, y kizas e ora ta for di 4’or di madruga mester bay lanta pa por yega Playa of Hotel na tempo?
Es mas, e ta pone hende bolbe pensa… cu kizas luz di trafico mes por a keda bon pa e cruzada, pero esnan nobo ‘intelligent’ lo por a haci un mihor trabao. Hasta varios ciudad Venezolano awor tin e luznan inteligente aki, cu ta hasta dunabo un countdown di seconde pa adverti e chofer, cuanto falta pa e luz bira berde, etc.
