ORANJESTAD (AAN) – Den entrevista cu Mediador di Gobierno, señor Anselmo Pontilius, el a splica cu e conflicto cu tin entre e Gerencia di NV ELMAR y Sindicato UEA, ainda no a wordo resolvi y intermediacion ta sigui.
El a splica cu e problema a tuma un rumbo unda cu ningun di e dos partidonan tabata papia cu otro, locual no ta genera un ambiente laboral sano manera mester tin.
Mediador Pontilius a menciona cu e ta formando parti di un “Comision di Tres”, conhuntamente cu ex-director di WEB Aruba NV, señor Jossy Lacle y mr. Glenn Thode, Rector di Universidad di Aruba.
Mediador a indica cu e reunionnan ta sigui cu e partidonan concerni, y diahuebs nan a reuni cu e Hunta di Comisario y algun miembro di e directiva, unda cu a pone fecha pa un proximo reunion pero tambe nan ta buscando un fecha pa reuni cu e dirigentenan di e sindicato UEA, cu ta representa e trahadornan di NV ELMAR.
Tambe a papia mesora cu e director di ELMAR, Ing. Robert Henriquez, cu actualmente tin vacacion pero dia 16 di Augustus otro siman e lo ta back na trabao y lo percura pa un continuidad di e reunionnan.
Pontilius a señala cu ta bay tin diferente opcion riba mesa y cada partido lo mester reuni internamente pa trata e sugerencianan cu Mediador ta bay duna nan, y di parti di Gerencia di ELMAR como di Utilities, nan tambe lo mester bay wak internamente si nan por presenta un posible solucion y si por discuti esaki cu tur e partidonan na mesa.
Asina e caso ta actualmente, y si e siguiente simannan tur cos ta keda cla lo trece tur partido hunto pa mira si lo tin un posible salida, principalmente riba e puntonan principal cu ta e pago cu e trahadornan ta reclamando y cu e supervisornan a gana den un caso den Corte.
Pontilius a agrega cu semper cu tin cambio tin resistencia y gerencia di ELMAR cu gerencia di WEB tur dos tabata na mesa caba y nan ta dispuesto pa sigui y nan a pidi e Comision di Tres si nan por yuda conduci y atende e proceso aki.
Eventualmente, Pontilius a bisa, si nan por resolve e puntonan grandi cu tin na mesa e Comision lo wordo invita pa e prome reunion general na unda lo topa tambe cu e gerencia y directivanan di e companianan di utilidad pa atende cu e procesonan.
El a subraya cu den e procesonan semper ta bin un speranza y e comision ta duna e mehor consehonan pa e directiva, supervisornany gerencia, hunto cu e trahadornan por forma diferente grupo y trata e cambionan cu tin den e restructuracion.
Pontilius a remarca cu un compania por traha pa trinta of cuarenta aña cu mesun sistema pero na momento cu bin cambio, ta logico cu nan tin cu involucra e trahadornan y convence nan cu e cambionan aki ta na bienestar di e empresa pa garantiza su existencia. Segun Mediador, hopi biaha tin resistencia debi na falta di e informacion exacto y precis riba kico ta bay sosode door di e cambionan aki.
