MEP ta kere den dialogo, pero dialogo real cu participacion real di tur gremio
ORANJESTAD (AAN): Durante conferencia di prensa di MEP, lider di MEP a elabora riba e instituto di ‘dialogo social’. Na opinion di MEP dialogo kiermeen papia y scucha opinion di otro; MEP ta kere den dialogo, pero no na e forma cu e gobierno di AVP ta haci. MEP a reuni cu varios persona cu a participa na e dialogo social, y nan a expresa nan desapunto den e forma con cos a bay.
Na prome lugar e gobierno di AVP no ta duna gremionan participacion den tur area, solamente cierto areanan, den cual mas bien ta usa e gremionan pa sconde nan tras.
Sindicatonan por ehempel ta lamenta cu no a trece cierto temanan crucial den dialogo social, por ehempel, cambio di ley di admision di stranhero, expansion di hospital, leerplicht, finansa publico.
Na di dos lugar, gremionan ta sinti cu gobierno no ta habri cu nan y no a duna nan tur informacion. Tin gremio cu a reclama cu ta riba e di tres dia, e ultimo dia di dialogo social, nan a haya e presentacion completo.
Tur esaki ta mustra cu gobierno no ta bezig cu un dialogo REAL, sino mas bien un monologo, pa asina por pasa decisionnan mas facil.
Pa locual ta e tema mes di dialogo social, esta rebaho di awa y coriente, ta algo cu WEB a anuncia ya un lunapasa caba. Awo gobierno a malusa e instituto di dialogo social, pa no pasa henter e rebaho, pero sconde tras di gremio, pa bisa cu ta gremio no kier duna pueblo e rebaho di 33%, pero menos.
Pa colmo por mira cu gobierno a core pone elementonan den dialogo social, di cual ya Parlamento a dicidi caba, unanimamente. Aki ta referi na e rebaho di invoerrechten riba airco inverter cu Parlamento a dicidi caba, y e tarifa soial. Parlameno a duna gobierno e instruccion aki basta tempo pasa caba, pero gobierno a keda sin ehecuta e instruccion di Parlamento pa tira santo den wowo di gremionan den dialogo social.
Esaki ta demostra cu locual gobierno a haci cu e pueblo ki ta meramente manipulacion.
Partido Movimiento Electoral di Pueblo ta kere den dialogo, pero di berdad, caminda cu ta duna participacion REAL na tur gremio, incluyendo clero, y no na e forma selectivo y unilateral cu e dialogo social ta worde usa door di gobierno di Mike Eman. Dialogo REAL pa participacion REAL!
