Nos mercado laboral birando vulnerable pa e trahado!
ORANJESTAD (AAN) – Basa riba e articulonan cu DIARIO a bin ta publicando, relaciona cu damanan na estado cu ta coriendo peligro di perde nan trabao pa motibo cu tin doñonan di trabao (sin generaliza) cu no kier tin hende muher embaraza na pia di trabao, a surgi varios reaccion tocante kico a pasando den termino general.
Por pensa mesora cu ta den sector priva so tin tension laboral, pero segun informacion cu nos ta hayando den gobierno tambe ta sosode, solamente cu den sector publico no ta zomaar y sin motivo por kita un trahador.
Pero si ta asina cu actualmente tin ambientenan laboral sumamente pisa cu ta creando un situacion cu no ta normal na pia di trabao den diferente empresa y algun departamento gubernamental.
Den sector priva, tin managernan cu ta “piki pieu” (segun reaccion), pa busca manera di retira un trahador pasobra el a yega, por ehemplo, un par di minuut laat, of pasobra el a pasa un dia di trabao cu kibranto di salud y e no por a produci manera ta su costumber, e dia ey.
Tambe tin hopi casonan di envidia entre e mes trahadornan, caminda tin cu ta gusta bay cerca e hefe cu redo riba un otro empleado, y asina aki ta acumula yen di motivonan di tension, cu ta haci e atmosfera na pia di trabao hopi pisa, y si un trahador ta perde pasenshi y ta haci algo fuera di sla, ya ta motibo pa nan suspende of retire mes. Ta obvio cu tin doñonan di trabao cu kier baha nan payroll y ta busca cualkier fout cu un trahador comete, pa kite for di trabao y hopi trahador (y doñonan di trabao tambe) no sa kico nos leynan laboral ta encera.
Den gobierno e problema ta abuso di poder di cierto trahadornan riba otronan cu nan ta considera mas debil, y medidanan cu ta worde tuma internamente cu ni sikiera ta fit cu e leynan cu tin, y falta di oido di hefenan directo pa esnan cu ta worde afecta. Semper tin e argumento cu “medidanan ta bin for di ariba y mester cumpli cu eseynan” maske con inexplicable y razonable nan por ta. Lo ta interesante si un dia por haci un encuesta na Aruba riba e grado di felicidad di nos pueblo, den un contexto global, unda cu clase trahador en general por expresa nan mes tocante e ambiente laboral den cual nan ta desaroya y biba ocho ora di trabao diario of kizas mas. Logico cu no por generaliza, tin camindanan unda cu e trahador ta haya mas aprecio y consideracion, pero mirando e avalancha di informacion cu a yega na nos mesa di redaccion, por deduci cu e problema ta basta generaliza caba.
