Paramento di Arubalening ta conduci na anulacion di seguronan
ORANJESTAD (AAN): Studiante di kende a para nan Arubalening, hopi biaha no ta para keto cu den e caso aki nan seguro tambe ta keda anula.
Ta trata aki di nan seguro di responsabilidad civil (aansprakelijkheidsverzekering), nan seguro di inventario di cas (inboedelsverzekering) y nan costonan pa repatria (repatriëringkosten).
Den caso cu no tin un seguro pa responsabilidad civil, esaki por resulta den risiconan financiero grandi.
Motibo pakico departamento di enseñansa di Cas di Aruba ta pidi atencion pa e question aki. Aparte di e informacion cu e studiantenan en question ya a ricibi, Cas di Aruba un biaha mas kier mustra cu enfasis e importancia di ta bon segura.
Paramento di e Arubalening por sosode door di diferente motibo: e por ta pasobra e studiante a stop cu su estudio pa un periodo of cu e studiante pa di dos biaha a cambia di estudio. Den e ultimo caso aki e fianza di parti di Gobierno ta keda para, te cu e studiante en question por mustra cu e a reanuda su estudio cu exito.
Na Cas di Aruba tin diferente caso conoci na unda un studiante a haya su mes den problema financiero pa motibo cu su seguro a keda anula, te cu deurwaarder a cai den e asunto. Intermediacion pa yega na un areglo di pago ta hopi biaha lo maximo loke cu Cas di Aruba por regla den un situacion asina. “Con fastioso esaki por ta pa esnan envolvi, esaki ta tipo di problemanan cu mayoria biaha por worde evita, si e informacion duna na nan worde bon absorba,” segun e hefe di departamento di enseñansa di Cas di Aruba Samuël Dumfries. “Realidad ta mustra cu algun studiante ta warda demasiado largo prome cu nan pidi ayudo, cual ta conduci na acumulacion di nan debe.”
E paramento di e Arubalening no ta conduci na anulacion di e seguro di malesa. Esaki ta sigui corre ariba un base individual, pero si cu un prima hopi mas halto.
