Partidonan Frente Obrero y PAR a uni cu otro pa forma un sosten di 11 asiento den parlamento
ORANJESTAD (AAN) – Matutino DIARIO a entrevista e lider di Partido Frente Obrero di Curacao, senjor Anthony Godett, cual partido tin representacion den Parlamento, tocante e situacion cu ta reinando den nos Isla ruman aworaki.
Godett a manda saludo pa pueblo di Aruba, na prome lugar. El a splica cu Diabierna e pueblo di Curacao a lanta confundi debi cu den oranan di madruga, den nomber di su Gabinete a acerca Gobernador di Antiyas, y a entrega na dje un peticion pa disolve Parlamento.
Sr. Godett ta haya cu tin un mal interpretacion di articulo 53 di Estado ta wordo mal interpreta, unda cu si no tin sosten den Parlamento a base cu dos miembro cu tabata sostene gobierno a kita esaki, y e partidonan cu a forma un mayoria di minimo diesun asiento den Staten, a manda un carta pa su excelencia pa pidie pa no honra e peticion pa disolve Parlamento.
Sr. Anthony Godett ta kere cu Gobernador a haya su mes den un tarea hopi pisa, y akinan ta na unda e aspectonan huridico tin un papel pa hunga, y su partido ta convenci cu e decision di diahuebs anochi ta ilegal y ta considere como un golpe di estado den un pais democratico.
Partido Frente Obrero su punto di bista ta cu no ta importa cual signature ta den gobierno, si nan ta haci un bon trabao, nan ta haya sosten di su fraccion, y si nan a traha malo nan ta haci un critica severo.
El a agrega cu tin dos extremo cu ta Pueblo Soberano y MAN, y Godett a bisa nan pa percura pa tin diez asiento y si nan logra pa yame, pa nan negocia un gobierno. Mescos nan a pidi e partido di sra. Emely El Hage cu tin ocho asiento den Parlamento, cu si PAR logra yega na diez asiento pa invita PFO libremente, pa bin na mesa di negociacion.
Esaki a sosode Diabierna mainta, ora cu PAR a mustra cu nan tin diez miembro cu por sostene un gabinete di nan signature. Nan a bay den un reunion unda cu PAR a firma y esaki a wordo manda pa Gobernador cu e peticion pa e tene cuenta cu tin formacion di partidonan cu tin minimo 11 asiento representa den Parlamento, loke ta nifica cu tin un garantia cu lo tin un gobierno cu ta conta cu e sosten aki den Parlamento di Curacao.
