Polis pa medio di helicopter a descubri auto horta.
ORANJESTAD.(AAN); Patruya di polis encarga cu distrito di Noord a bay atende diamars mainta un caso di ladronicia na Papaya. Na e direccion a resulta cu ladron a horta un Toyota Yaris blauw cla A.40184.
E señora denunciante di inicialnan J.A.M.M. a declara di ta doño di e vehiculo y el a staciona su Toyota dialuna ultimo pa 5’or y 30 den cura di su cas.
Su siguiente dia pa 7’ or y 20 di mainta, e kier a bay traha, pero el a descubri cu su Toyota Yaris a somenta. E señora ta e tantisimo victima di ladronicia di auto riba e pida baranca aki, mientras tanto pa medio di helicopter, esnan abordo a wak un Toyota Yaris blauw cla A 40184 bandona tras di Centro di Bario Playa pabao.
E capitan a reporta e caso pa 10’or mas 4 minuut diamars mainta na central di polis.
E auto a wordo hiba pa Papito Towing pa warda di polis Santa Cruz pa investigacion.
Ta di remarca cu e team di polis combina cu helicopter a wordo activa pa bay guera contra di ladronnan di auto. Alto mando recien a instala e teamnan combati criminalidad cu man duro. Den un tempo relativamente corto pa medio di helicopter a bin localiza e auto. Ta spera cu por haya evidencia pa gara a ladronnan. Informa adicional relaciona cu e caso aki ta indica cu unidad di polis motoriza a presenta tras di Centro di bario Playa Pabao y a constata cu e hood di e Yaris ta habri y e bentana patras na banda robez ta destrui. E dashboard a wordo a wordo saca completo for di otro, bateria, radiator, airco, bumper dilanti, wanta lodo dilanti na banda drechi a wordo kita. Por conclui cu ladronnan no solamente a horta e auto pero nan a pluma esaki casi completo.
No ta por nada ta mik riba e modelonan di auto pero tras di e ladronicia y hortamento di pieza tin su motibo. E piezanan horta ta pa bay bende of entrega na esnan cu mester di nan pa un motibo of otro. Sea pa demanda local of pa wordo manda pa exterior. Douane recherche lo ta partner cla pa hunto combati criminalidad na salida sea via di haf of aeropuerto.
