Home Hudicial Presonan cu hopi keho durante tratamento di caso na KIA mes

Presonan cu hopi keho durante tratamento di caso na KIA mes

0
0
SHARE
- Advertisement -

ORANJESTAD      (AAN): Diamars a tuma lugar un caso sumario na KIA.

En bez di cu e caso a tuma lugar na corte, a dicidi di haci esaki na KIA mes.

Huez prome cu e caso a cuminza a splica cu e motibo cu el a dicidi di haci e caso na KIA mes ta pa garantiza mas ainda seguridad di tur hende y e hecho cu e kier a pasa tira un bista den e celnan y otro facilidadnan di KIA.

Esaki door cu e caso a worde entama pa 13 preso cu ta sinti cu varios derecho, privilegio di nan a worde viola.

Nan ta sinti cu nan ta cera bao di condicionnan inhumano.

Ta trata di e presonan Mario M., Ryan R., Edmond L.A.N., Jair R., Contino G., Andre W., Dionisio B. Tricio G., Yesencia C., Daniel K., Gerald D., Luis F. y Alexander H., kendenan a cuminza e caso contra Gobierno y nan a worde representa pa abogadonan Scheper y Marchena, mientras cu Gobierno a worde representa na abogadonan Baiz y Verblackt.

E preso Ryan R. no tabata presente, door cu el a Sali for di KIA caba.

Abogado Scheper a cuminza menciona e kehonan cu e presonan tin.

Entre otro el a menciona cu na cierto caminda e beton ta kibra y pida hero ta Sali for di e vloer y muraya.

E presonan ta haya molester di insecto, e spotlight di pafo, awacero cu ainda ta drenta den e celnan.

Tambe el a indica cu e espacio di e cel ta mucho chikito pa cera tres hende hunto.

El a bisa tambe cu tin falta di privacidad, specialmente ora cu nan tin cu haci nan necesidadnan, tin mucho tiki guardia cu ta pone cu e presonan ta sinti nan mes menos sigur.

Falta tambe slang pa paga candela y por ehempel un sistema di ‘sprinkler’ tambe pa ora cu tin candela.

E presonan ta haya tambe cu no tin actividadnan pa nan participa na dje manera ta poni den e reglamentonan di KIA.

Nan kier mas posibilidad di haci deporte y na programanan di rehabilitacion.

E abogado a menciona tambe cu e matras di e presonan no ta mucho bon y cu nan falta klechi di cama.

Tambe el a bisa cu e cuido medico den KIA ta laga hopi di desea.

Segun Scheper, esakinan tur ta un indicacion cu regla y derechonan local y internacional di e presonan ta worde viola.

El a bisa cu den e reglanan di KIA tin para cu e presonan mester haya e oportunidad di traha y participa na diferente actividad y cu esaki no ta sosode suficiente.

Nan tin e derecho tambe di 1 biaha den cada dos siman haci uso di biblioteca y esey no ta sosode tampoco, segun Scheper.

Ora nan tin un problema medico, ta tarda mucho prome cu dokter wak nan y segun e abogado tin solamente 1 trahador social den KIA y esey ta mucho tiki.

El a splica tambe cu aña pasa caba a tuma lugar un caso contra Gobierno door di e problemanan den KIA y huez a dicta cu cambionan mester a worde haci.

Segun Scheper, e cambionan ey no a sosode suficiente, pasobra entre otro ainda e presonan ta haya awacero den nan cel y ainda tin 3 persona den cada cel.

E abogado a mustra tambe riba e hecho cu hopi biaha e presonan ta keda 18 ora den nan cel, siendo cu nan tin derecho riba 8 ora pafo di nan cel.

E presonan tin kehonan tambe riba e cuminda cu nan ta haya y e ora cu nan ta haya esaki.

E abogado a bisa tambe cu como cu KIA falta personal, tin biaha ora cu tin un confrontacion entre algun preso, no tin of no tin suficiente guardia presente.

Cos ta asina malo cu te hasta e guardianan di KIA a bay den accion algun tempo atras, cu ta un indicacion cu mester bin cambio, segun Scheper.

Ademas di esaki el a bisa cu e seccion di homber no ta worde teni mes limpi cu e seccion di hende muher.

Segun Scheper, ora cu un preso no tene su mes na e reglanan di cas, e ta worde disciplina, pero constantemente persona di KIA no ta tene nan mes na e reglanan di cas, door di keda sin permiti e presonan di haci uso di nan derechonan.

Annemarie Verblackt representando Gobierno a bisa cu durante caso di aña pasa e huez a stipula cu actualmente no ta un problema pa 3 preso ta den un cel.

E abogado a bisa tambe cu e cambionan debido a worde haci pa para e awacero di drenta e celnan.

Pa loke ta e supuesto molester di e spotlight, Verblackt a indica cu e luz ey no ta worde dirigi riba e celnan.

El a bisa cu e presonan ta keda di insecto, pero nan no a bin cu ningun evidencia cu por ehempel un di nan a bira malo door di esaki etc.

Ademas ta asina tambe cu 1 biaha pa luna ta spuit insecticida pa combati cualkier problema cu insecto cu lo por tin.

Pa loke ta e problemanan medico, e abogado a bisa cu tin 3 enfermera ta traha den KIA y cu si tin un problema serio, un dokter por bin hopi lihe for di Centro Medico San Nicolas.

El a bisa tambe cu KIA no tin problema pa loke ta un posibel candela.

Tur luna persona di Brandweer ta bin haci un chekeo y ta duna sugerencianan.

Pa loke ta cuminda, semper esaki ta bay hopi bon segun e abogado.

El a bisa cu door cu aparentemente e presonan a keha, a bay asina leu di bin cu un ‘caterer’ nobo pa nan.

Verblackt a bisa tambe cu pa loke ta e actividadnan, Enseñanza pa Empleo ta activo dunando diferente curso den KIAS, tin biaha algun di e cursonan te hasta ta worde duna pa otro sospechosonan cu tin e experticio.

Pa loke ta falta di personal, e abogado a bisa cu actualmente tin 17 persona den opleiding pa bira guardia na KIA.

Huez na dado momento a bay hunto cu e abogadonan pa wak e celnan di KIA y algun otro parti di e lugar, pa asina e mes por haya un impresion di e condicionnan den cual e presonan ta biba.

Despues di esey huez a duna e presonan e oportunidad di papia y na final di esey el a bisa pa e abogadonan cu ta representa e presonan reacciona por escrito otro siman Diabierna riba locual e abogadonan di Gobierno a trece dilanti y e siman despues e abogadonan di Gobierno tin cu reacciona riba e abogado di e presonan.

Alrededor di 1 siman despues huez lo duna su veredicto.

- Advertisement -

DUNA COMENTARIO

Please enter your comment!
Please enter your name here