Prome Minister Mike Eman “E hobennan aki a inverti den nan mes”
Proyecto Formacion Social
ORANJESTAD(AAN):–E proyecto Formacion Social ta siguiendo e rumbo positivo riba e caminda firme cu el a cuminsa for di un principio.
Dialuna cu a pasa cuatro hoben di Formacion Social a ricibi nan certificadonan di APA na unda nan a core nan stage di cuatro luna.
Diamars e otro cuatronan cu a core nan stage den Valero a haya nan certificado y nan tambe ta bayendo awor pa e ultimo fase di nan trayecto cu ta un curso den Computerkunde di cuatro luna na Enseñansa pa Empleo.
Prome Minister Eman a bisa cu su gobierno a inicia e proyecto aki pasobra cu a wak rond y a mira hobennan cu hopi potencial, pero cu den un momento den nan bida tabata den duda si nan kier a sigui desaroya un ofishi, bay traha of sigui studia y dor di e duda aki a perde oportunidadnan di e momento. “Nos tur tabata hoben un tempo y nos tur ta corda cu na cierto momento den bida nos tambe tabatin e pregunta y dudanan aki”. Eman ta bisa cu den casonan asina un maestro di scol, un mama cu atencion special, un bisiña, un pastor of un lider manera sr.Hofma, sr.Buckley, sr.Werleman y otro dirigentenan por cambia e bida di un hende. “Nos tur tin un persona asina cu a toca nos den nos bida. Personanan cu a guia nos. Ta pesey cu e programa aki a wordo desaroya pa yuda e hobennan aki cu tanto talento y potencial cu tin e amor y sosten di nan famia y amistadnan, por haya un oportunidad nobo den bida pa forma e base di un futuro nobo”.
Eman a bisa cu sea e base aki ta e norma y balornan cu sr.Hofma a referi na nan. Of loke sr.Werleman a haci dor di hiba nan den cunucu leu pa nan so cu solo y strea reflexiona y pensa riba nan responsabilidadnan. “E hobennan aki a inverti den nan mes dunando nan mes un siguiente oportunidad den nan bida. E transformacion a tuma lugar na e momento husto cu pa nan ta hopi importante”.
Prome Minister a bisa cu e proyecto Formacion Social ta wordo haci cu ayudo di gobierno Hulandes cu ta haci posibel cu Marina tambe ta un partner indespensabel den henter e proceso aki. Despues Eman a bay over na entrega cada un di e hobennan un recuerdo cu un inscripcion.
