Diario Online

Prome Minister ta splica pakico mester fiha tarifa reduci di awa y coriente den Dialogo Social

Publication: Wednesday, 1 August 2012. Categoria: General

Cu intencion pa esnan mas vulnerable haya mas reduccion:

ORANJESTAD (AAN) — Den entrevista cu DIARIO a realiza cu Prome Minister mr. Mike Eman, el a wordo puntra tocante e carta cu a sali for di WEB y cu tin di haber cu prijs nobo di awa y coriente y awor cu a bira un discusion hasta politico, y cu a crea e pregunta cerca cierto sindicatonan, pakico a purba pusha esaki den un Dialogo Social.

E dignatario a señala cu gobierno no a pusha esaki den Dialogo Social pero a palabra esaki anteriormente den e prome fase ora nan a trata e tema di energia, introduccion di energia alternativo, trayecto di gas, etc.

E puntonan aki a wordo trata y e reunion a wordo aplaza na momento cu a trata e tarifanan nobo, pasobra WEB y ELMAR no tabata cla pa papia tocante esaki.

Premier Eman a subraya cu semper tabata intencion di gobierno y di e gremionan social di tin un participacion, den e proceso di fiha e tarifanan.

E motibo pa cual ta importante pa esaki wordo trata den un Dialogo Social, ta pasobra WEB y ELMAR a notifica gobierno cu mirando e prijs di fuel oil, e cantidad di energia di biento, e proceso di eficiencia cu WEB por introduci un tarifa di awa y coriente reduci cu tanto porcentahe y ta keda na gobierno e ora ey dicidi si e porcentahe aki, sea ta 7 porciento, por ehemplo, conta pa tur hende, of duna e grupo di hendenan di menos recurso un porcentahe mas grandi di reduccion, esta 7,8 of 9 porciento y esnan cu por un tiki mas, menos rebaha.

Esaki ta un proceso riba cual gobierno no por impone na e partnernan social pero kier duna algo na tanto e empleadonan cu ta representa den e sindicatonan como esnan cu ta representa pa e gremio comercial, cu den hopi caso ta esnan cu mester bay haya menos di e reduccion, for di e concepto di socializacion cu esnan di menos recurso.

Esaki ta loke a wordo palabra e dia cu a reanuda e Dialogo Social y cu a fiha un agenda cu dia 7 di Augustus lo sigui cu e Dialogo riba e tema di energia, pa introduci e tarifa nobo.

E mandatario a indica cu e no ta compronde un sindicato cu ta boga pa e reduccion ta mescos pa tur hende cu no ta na fabor pa socializa.

El a agrega cu si e tarifa nobo drenta na vigor na Juli of Augustus semper por conta cu e reduccion e siguiente luna, pesey e no ta di acuerdo cu e argumento cu no por warda mas y pa introduci un solo porcentahe aworaki. E pensamento aki no ta huicioso y e gobierno aki, e dignatario a remarca, no ta presta su mes pa no utiliza e oportunidad aki di socializa e tarifanan.

El a indica cu podise e sindicatonan cu ta pensa asina a custumbra cu ocho añanan cu no a socializa riba ningun tereno, y cu “friends & family” a bay cu tur e rikezanan di e pais aki.

El a subraya cu aworaki tin un cambio di gobernacion cu ta mira cada oportunidad di por yuda esnan di menos recurso, pero kier haci esaki den consenso cu e sindicatonan y e gremionan comercial y gobierno a sinti un apoyo hopi grandi for di e partnernan aki pa cana e trayecto aki.

E ta kere cu e sindicatonan cu ta pensa otro, posiblemente no a haya e informacion pa por compronde exactamente kico tabata e motibo, y naturalmente gobierno ta cla pa splike un biaha mas, pasobra no ta nada politico pero pa socializa e tarifanan na fabor di esnan di menos recurso.

Prome Minister a reitera cu e no ta kere cu por tin un sindicato cu ta contra esey, ni contra e pensamento y den e proceso di socializacion gobierno kier scucha precisamente e sindicatonan, pasobra gobierno kier duna e break entre 7 pa 9 porciento pa esnan di menos recurso, pero por ta si un sindicato ta haya cu mester ta 12 porciento e mester kier tin e oportunidad di trece dilanti den e Dialogo.

Si e no ta desea esaki e no ta poniendo e interes di su miembronan ni di esnan di mas vulnerable di nos pais na prome lugar.