Home General San Nicolas pronto ta conta cu cayanan renoba y mas edificio na...

San Nicolas pronto ta conta cu cayanan renoba y mas edificio na servicio di pueblo

0
0
SHARE
- Advertisement -

ORANJESTAD(AAN):–E trabounan di renobacion y mehoracion riba nos isla, ehecuta dor di Gabinete Eman ta progresando den tur skina. Manera Minister Mike de Meza a anuncia e siman aki, tin varios proyecto na San Nicolas den diferente fase di avance. Dos di nan cu ta na punto di keda cla ta e post bieu di ambulance y Ottaheitistraat.

Un bes ciudadanonan di pariba di brug por cuminsa disfruta di e resultado final di e trabounan cu a tuma arkitectonan y DOW algun luna pa concretisa. E vision di Gobierno di Aruba ta pa henter pueblo por disfruta di un isla di calidad halto den infrastructura y facilidadnan publico cu consecuentemente lo eleva e nivel di bida di cada Arubiano.

Pa loke ta trata e post bieu di ambulance na San Nicolas, e proyecto aki a cuminsa na november 2011 y ta representa un inversion di 500 mil Florin. E meta di e proyecto aki ta pa e fungi, entre otro, como punto di encuentro pa e habitantenan di e districto cu kier bin papia cu Ministernan, pero na mesun momento como facilidad di reunion pa Conseho di Minister ora cu ta trahando y atendiendo asuntonan cu ta concerni pariba di brug.

Arkitecto di e proyecto aki, Sr. Thomas Quandus a splica cu nan a bin haya e edificio den un estado deplorabel. Esaki pa motibo cu pa hopi aña no tabatin ningun atencion ni tampoco trabou di mantencion haci riba e edificio. Adicionalmente, cierto hendenan a cuminsa uza e tereno eynan como un dump.

Prome cos cu a haci ta evalua e structura y a dicidi pa basha parti di e edificio abou, mientras cu e murayanan firme a keda y for di eynan a sigui na reconstrui. Pa loke ta e diseño, cinco luna prome cu e trabounan a cuminsa, a traha riba esaki teniendo na cuenta e futuro uzo di e edificio. Pesey mes tambe a opta pa amplia e espacio di construccion di 130 meter cuadra te na e maximo di 175 meter cuadra.

E edificio, situa na e skina di Pastoor Hendrikstraat y Weg Seroe Preto, actualmente ta pa 90% cla y por haya un bon idea con e ta bay bira. Parti paden falta pa ta cla ainda pasobra mester cumpli cu hopi mas rekisito. Den e diseño tambe a tene cuenta cu hendenan cu tin un incapacidad fisico, pa tal motibo a percura pa traha subida y instala rails, ademas di bañonan adecua.

E edificio den su forma nobo ta conta cu shete camber incluyendo sala di espera pa publico cu nan respectivo baño, oficina pa personal, sala di reunion individual y sala di reunion di Conseho di Minister. Pero no ta solamente e edificio y su interior a haya un mehoracion. E infrastructura rond di dje incluyendo e cayanan Pastoor Hendrikstraat y Weg Seroe Preto tambe a haya asfalt nobo, trottoir a haya klinkers nobo, a pone baki di mata y otro facilidad mas.

“Cu hopi orguyo mi kier bisa cu e luga a keda una beyesa pa loke e tabata anteriormente,” asina e arkitecto di oficina Architects & Engineers N.V. a indica. Construccion tabata den man di Van Den Broek Construction.

E otro proyecto na San Nicolas cu ta casi cla ta esun na Ottaheitistraat. E caya aki tabata den hopi necesidad di un reparacion y pesey mes departamento di DOW a pone man na obra. Sr. Jossy Kock a indica cu Ottaheitistraat awor ta den e ultimo fase cu ta e touch up y ta cabando cu detayenan chikito manera tegels y streetscape. Ya caba a cambia e capa di asfalt y su respectivo base por completo poniendo uno totalmente nobo cu sigur automobilistanan di e bisindario ta keda satisfecho cune.

Asina tin hopi otro proyecto den desaroyo pa mehora San Nicolas y bisindario, manera ampliacion y restauracion di Joe Laveist Sport Park, e parke dilanti Postkantoor, mehoracion di Lago Heights, Diamantbergweg y henter e area di y rond di Village incluyendo un museo di Carnaval. Gabinete Mike Eman ta cumpliendo cu e promesanan haci na e pueblo di pariba di brug y e trabounan y nan diferencia ta visibel tur caminda.

- Advertisement -

DUNA COMENTARIO

Please enter your comment!
Please enter your name here