Tiara Air ta bay expande su rutanan na Venezuela, Colombia y Fort Lauderdale
Ademas cu lo bira un hub:
ORANJESTAD (AAN) – Den conferencia di prensa, señor Alejandro Muyale, director di Tiara Air, a hiba palabra y a bisa mustra su satisfaccion cu awor e aerolinea por bula su Boeing 737.
Muyale a felicita y gradici henter e team cu a traha riba e proyecto aki hunto cu e team di Aviacion Civil.
Tur dos a traha conhuntamente te cu diaranzon nan a logra di firma e acuerdo concerni, sabiendo cu e compania a cumpli cu tur e rekisitonan di ICAO, FEE, Aviacion Civil.
Muyale a expresa su emocion y a bisa cu esaki ta un proyecto cu tabata tin basta tempo den proceso. Nan a trece e avion for di Februari, y a dura como tres luna mas pa e ta cla pa bula.
E director di Tiara a indica cu e proceso aki no a bay facil, tin hopi rekisito cu mester cumpli cune, y e ta kere cu esaki ta un di e motibonan cu despues cu Air Aruba a cera 15 aña pasa, no tabata tin mas aerolinea cu a yega lanta pasobra esaki no ta bay asina sin mas.
Señor Muyale a subraya cu nan a dedica hopi tempo na e proyecto aki, y e hecho di ta na Aruba y di tin e motivacion y vision pa nos Isla, pa e pida baranca aki cu nan tine den e curazon, y nan deseo pa por contribui na e turismo di Aruba, ta un di e aspectonan cu a yuda nan pusha y tuma e retonan pa logra e meta.
Muyale a expresa cu nos ta haciendo historia atrobe door di tin un jet di un compania local cu por bula pa exterior, pasobra for di 15 aña pasa no tabata tin un jet matricula basa na Aruba.
Tiara a nace na aña 2006 y te cu aña pasa el a move mas of menos cien mil pasahero anualmente, y añadiendo e 737 aki nan ta bay agrega otro cien mil mas, den un periodo di un aña, ya cu e ta un avion di 141 asiento.
E plannan ta pa contribui na e mercado turistico completo cu ta bishita Aruba, nan ta bay abarca banda di diez porciento di e total, ta bay habri mercadonan nobo y traha cu Oficina di Turismo, riba tur e destinonan cu nan tin aworaki, pa facilita mas airlift. E plannan ta pa habri aki mas of menos seis siman destinonan na Venezuela manera Caracas y Maracaibo, na Colombia Medellin y Armenia, y na Merca Fort Lauderdale, y el a agrega cu segun añanan ta bay e compania ta bay sigui crece. Muyale a expresa palabranan di danki pa e director interino di Aviacion Civil y a bise pa sigui supervisa nan.
Muyale a señala cu manera tur hende por mira Tiara Air tin dos avion cu un bunita logo di Aruba riba nan, y e jet ta bin cu un logo mucho mas grandi y aworaki e ta bay cuminza bula den diferente area y promove Aruba hopi mas, pasobra para riba rampa so e avion di Tiara Air a mercadea Aruba masha hopi mes.
Na henter e team di Tiara y henter pueblo di Aruba, Alejandro Muyale a yama pabien y a pidi pa duna nan sosten pa sigui bay dilanti.
Tiara su personal localmente ta 60 excluyendo esnan staciona afo, y en total nan ta yegando 100 hende caba. Basicamente cada avion ta rekeri un minimo di cuater crew, esta cuatro capitan, cuatro copiloto, y den e caso di e 737 tres cabina y asina mester a amplia tur departamento pa por maneha e fluho grandi cu ta bay surgi ora cu e avion aki cuminza bula.
El a agrega cu aeropuerto a traha un hangar di dos mil meter cuadra, unda cu e 737 ta drenta completamente den dje y e ta den uso caba. E avion ta warda den dje aworaki y tambe Triple A ta trahando pa convirtie den un hub. Kiermen ora e avionnan chikito di Tiara yega por conecta cu e avion grandi pa e pasaheronan sigui pa otro destinonan.
Esaki ta un porcentahe di e mercado riba cual ta bay traha y conta riba dje tambe, sr. Muyale a indica. Finalmente señor Alejandro Muyale a señala cu door di tur e mercadeo y accionnan di Aruba, e fluho di pasahero di Tiara Air no a baha, pero a mantene su mes aunke nan ta gasta menos.
E mercado Venezolano ta sigui bin y tur esaki ta yuda pa e aerolinea sigui sobrevivi apesar cu a drenta den e mercado na momento cu e situacion di aviacion no tabata facil.
