Door di hopi organizacion publico y priva
ORANJESTAD (AAN) – Den entrevista cu Matutino DIARIO, Rector di Universidad di Aruba mr. Glenn Thode, a elabora tocante e interes di diferente instancia priva cu ta acerca U.A pa haci investigacion pa nan riba diferente tema.
Rector mr. Thode a señala cu Universidad ta wordo acerca pa hopi organizacion di nos comunidad, di cual APA ta un ehemplo, pero tin hopi mas instancia cu kier haci uso di e recursonan cu U.A ta genera, manera estudionan academico cientificamente bon funda, di manera cu nan por haya e data of informacion cu Universidad ta acumula y e sistema con e Academiconan ta analiza e informacion, pa U.A comparti esaki cu nan, pa nan por haci nan trabao mehor.
Entre otro, PAHO y El Faro a acerca Universidad cu tin necesidadnan asina, mescos cu Hospital y diferente otro di nos partnernan social den e comunidad Arubano. Nan tin mester di e input academico cu Universidad ta provee.
Esaki ta yuda Universidad di Aruba pa cumpli cu e meta di coopera cu e desaroyo di nos pais, y pa mira cual ta e necesidadnan cu tin eyfo pa por cumpli cu esakinan. Como cu esaki ta creciendo, Universidad ta mira cu mester forma mas Academico y tambe publica mas y amplia su net di hendenan specializa y academicamente bon forma pa por provee e servicionan aki.
Un parti di e necesidadnan aki ta wordo cubri cu e capacidad di e studiantenan mes, incorporando nan den proyectonan cu Universidad ta desaroya, pero tin diferente peticion cu e studiante no a yega ainda na e nivel pa cumpli cune.
E ora ey tin mester di e docentenan cu ta academiconan forma caba of di nan network pa trece e expertonan cerca di otro, pa asina por duna e servicio.
Actualmente, mr. Thode a subraya, Universidad su capacidad ta demasiado abao pa por cumpli cu tur e peticionnan, y e ta algo cu mester mira e peticion, e necesidad y traha riba reforza e capacidad pa por cumpli cu e necesidadnan cu tin den e comunidad.
Tur sociedad cu kier desaroya su mes den un comunidad mas profesional, ta tuma decisionnan a base di informacion mehor funda, bon verifica, y esakinan ta e principionan academico tambe, y Universidad ta mire como cu nan tin e tarea di yuda comunidad desaroya su mes, y e tarea di desaroya profesionalnan na Aruba. Asina nos pais ta desaroya su mes mehor y tin menos desperdicio ora cu algo ta bon studia y analiza prome, pa tuma e pasonan den cual ta kere cu lo tin e efectonan desea.
