Diario Online

WEB cu su posicion agresivo di ‘power play’ no ta beneficia pueblo

Publication: Thursday, 2 August 2012. Categoria: General

ORANJESTAD(AAN):– Berdad ta cu decisionnan di e compania estatal WEB mester cumpli cu reglanan di su statutonan di su unico AANDEELHOUDER cu ta gobierno di Aruba! E reglanan aki mester ta na bienestar di WEB, di e clientenan y na bienestar general!

Esaki ta e responsabilidad di gobierno di Aruba. Pueblo ta puntra su mes si e reglanan cu aparentemente WEB kier aplica ta wordo considera tambe ora aña den aña’fo, WEB ta duna su empleadonan salario- y beneficionan fuera di tur proporcion cu sin ningun motibo ni hustificacion ta mucho mas halto cu e nivel di pago na Aruba.

Esaki ta solamente posibel ora un compania ta abusa di su posicion monopolista manera ta e caso di WEB. Naturalmente esaki a y ta influencia negativamente e share di e accionista! Den caso di WEB, esta Land Aruba (lesa pueblo di Aruba) cu ta e unico accionista. Ora di regala bonus halto y ofrece entradanan halto na entre otro consultantnan priva, e ora ey si no ta papia di Corporate Governance, ni di statutonan ni di interes di WEB.

E ora ey ta interes particular so ta conta. Ta berdad tambe cu awa ta un derecho fundamental y no un luho, pero como usuario di awa pueblo kier awa PAGABEL y no mester ta asina cu e ganashi di WEB primeramente ta bay pa su empleadonan y si resta algo, podise pueblo cu ta ‘doño’ di e compania aki, ta haya un cachi cachi pa tira santo den su wowo. Naturalmente e empleadonan mester wordo paga decentemente pero loke nan ta gana ta un dineral, esaki ta un secreto publico.

Lo ta bon pa gobierno laga haci un evaluacion di e pago di directornan y staff di tur compania estatal y compara esaki cu e otro companianan di estado, ambtenaren y sector priva! Ey’nan ta caminda e rabo di porco ta krul! Lo ta bon pa averigua tambe kende ta e consultantnan cu ta traha den e companianan aki, nan salarionan y famia di kende nan ta! Onderonsjes ta parce di ta na ordo di dia si e informacion cu nos a ricibi ta berdad y no tin motibo pa duda den e informacion aki! Salarionan riba 20 y 30 MIL florin pa luna consultantnan ta cobra eyden.

Aki ta caminda pueblo y gobierno mester haci e investigacionan! Hecho ta keda tambe cu e gobierno anterior a saca miyones na granel for di su companianan estatal te yega na e suma espantoso di 240 miyon florin. Algo cu e actual gobierno no a haci.

 Ta pesey mes cu gobierno mester percura pa e ganashi di WEB ta bay den saco di pueblo bek den forma di un rebaho cu ta wordo haci den concordancia cu partnernan social, sindical y commercial.

Dia cu cualkier director di in compania estatal subi un lista politico y logra haya e confiansa di pueblo, anto e ora otro gai ta canta. Ta aki na Aruba so e tipo di weganan aki por wordo hunga.

A bira tempo pa gobierno atende cu e asuntonan aki y duna muestra cu ningun hende den ningun compania estatal por kere cu e por hunga baas y manda na grandi cu placa di pueblo!