Ya ta ora pa Minister di Husticia lanta for di soño
Parlamentario mr. Andin Bikker:
y presenta su plan pa combati criminalidad!
ORANJESTAD (AAN) – Fraccion di Partido Democracia Real (PDR), a tene su conferencia di prensa semanal, diamars mainta, conduci pa su lider mr. Andin Bikker.
Un total di seis punto di agenda e Parlamentario a trata cuminzando cu e tema di husticia, sigui pa cobranzanan di grondbelasting, Dialogo Social y funcion di Parlamento, Turismo y impuesto di salida, e lucha riba spearfish, y pa ultimo e presentacion riba energia na Aruba den Parlatino.
Cada tema DIARIO lo publica den diferente articulo y nos ta cuminza cu e prome topico.
Parlamentario mr. Andin Bikker a señala cu tin falta na Aruba di un maneho concreto riba husticia. Desde aña 2010 cu PDR a drenta Parlamento, el a keda insisti tanto por escrito como verbalmente, pa Minister di Husticia presenta un plan di maneho riba criminalidad.
Esaki mirando mas ainda cu den encuesta di PDR a haci, hibando e campaña politico di 2009, bishitando 5 mil cas, a bin dilanti cu e prioridad ta seguridad; cu pueblo ta sinti insigur for di e tempo ey caba y cu nos comunidad kier pa criminalidad wordo combati na un forma optimal.
Recientemente, tabata tin presentacion den Sala di Parlamento, di un estudio cu a wordo haci riba con e ciudadanonan ta sinti nan mes, y eynan tambe a resalta grandemente cu un porcentahe masha grandi di nos poblacion ta sinti su mes insigur.
Parlamentario mr. Bikker a subraya cu esaki no ta algo straño pasobra prome cu e gobierno aki a sinta, ya caba tabata tin hopi reclamo, pa loke ta trata combatimento di criminalidad, y e gobierno aki cu ta sintando pa tres aña caba a priminti cu ta bay haci algo riba esaki sinembargo no tin ni un plan.
E lider di PDR a señala cu durante di tratamento di presupuesto, varios biaha e minister a bisa cu e ta bezig cu e plan. Na Februari ultimo, riba insistencia di fraccion di PDR, el a declara den Parlamento cu e plan ta existi y cu e ta circulando den cierto departamentonan pa perfeccionamento, pero PDR a puntra na diferente departamento concerni y nan ta bisa cu e plan nunca a yega cerca nan.
Nan a bisa cu ohala, pasobra nan ta anhela pa tin un plan pasobra nan ta sinti cu ta trahando ad-hoc y e pregunta ta si e ta existi mes pasobra ningun hende ta mire.
Y si ta asina mes, den tres aña di gobernacion bayendo pa cuatro, cu ta e aña electoral con por a tarda asina tanto pa presenta un plan pa combati criminalidad.
Parlamentario mr. Bikker a acentua cu na final di dia pueblo si mester a experiencia cu practicamente tur dia tin atraco, autonan ta wordo horta constantemente, unda cu via blackberry pin y den medionan di prensa, constantemente tin suplica di ciudadanonan cu nan auto a wordo horta, si por yuda nan pa haya nan auto back.
Tambe e ta tuma nota di remitidonan den corant di ciudadanonan masha rabia pasobra despues cu nan a horta nan auto nan ta haye tur pluma, pero si nan tin cu sigui paga e fianza riba e auto aki.
E situacion aki ta inaceptable pero di parti di Minister di Husticia e no a presenta nada concreto den Parlamento, apart di locual ta andando caba for di prome cu e minister a drenta den gobernacion, cu ta e Ley di Codigo Penal, e no a presenta nada concreto y mr. Bikker ta kere cu e mester bin cu algo concreto.
Por escrito el a bisa na Parlamento cu na Maart e lo presenta e plan aki, y ya caba nos ta bayendo pa Augustus y por mira cu e mandatario a keda tene Parlamento na linea, pero mas cu tur cos e ta keda tene pueblo na linea.
Mientras tanto nos ciudadanonan ta pasa den e experiencia amargo cu nan propiedadnan ta wordo hiba. PDR si di su banda, maske e no ta ainda den gobierno, a trece diferente proposicion y amienda, pa haci un esfuerzo pasobra su filosofia ta no solamente critica, pero bin cu solucion.
Entre otro e fraccion a introduci e Ley di Defensa Propio, y tambe den e presupuesto alternativo cu PDR a bin cune, a presenta un plan “Crime Alert” na unda cu e ciudadanonan por registra den un punto central pa duna aviso na Warda di Polis, unda nan ta coordina e mensahenan ora cu un atraco tuma lugar of un auto wordo horta y cu e ciudadanonan cu yuda resolve e crimen aki, ta haya un recompensa manera ta e caso na Merca aworaki.
Esaki a pasa den Parlamento pero no ta mira cu Minister di Husticia ta move riba esaki tampoco, segun Parlamentario mr. Andin Bikker a remarca.
E ta puntra ta kico ta e intencion anto, pasobra pueblo ta exclama y ta merece atencion riba esaki. Nos Isla turistico ta hopi vulnerable pa hechonan di criminalidad, y ta bira tempo pa drecha e situacion aki na un manera serio.
El a subraya cu por ehemplo awor cu tin atraconan ta tumando lugar, CID (Intelligence Dienst) mester profila mas den cual ta e gruponan cu ta propiciando atraco pasobra no ta di un dia pa otro un persona ta planea pa atraca otro, pero ta hende cu kizas ta bakia caba. Den un isla chikito manera nos tin, mester intensifica e informacionnan cu Cuerpo Policial y Cuerpo di Investigacion ta haya, pa por combati y preveni e tipo di actonan aki, y resolve nan mas pronto posible.
Parlamentario mr. Andin Bikker a acentua cu KPA ta haciendo un trabao sobresaliente pa loke ta concerni combatimento di criminalidad, asina mes cu no tin un plan riba mesa, pero e plan aki mester ta integral, kiermen no solamente e parti represivo ora un crimen surgi, pero den su totalidad y esey nos pais tin falta di dje pa tres aña largo caba y a bira tempo pa Minister di Husticia lanta for di soño!
