ORANJESTAD(AAN): Ambulans tabata moviendo riba Sasakiweg cu e switch di Sirena constantemente na ‘on”. E luznan tabata cendi, zwaailicht ta draai, y sirena ta sona sin stop.
Tur hende na cruzadanan tabata slow down, hala un banda, y laga e Ambulans pasa. E tabata moviendo cu urgencia pa un posibel caso di hogamento na altura di e proyecto nobo di Ritz Carlton Hotel.
Pero na un forma increible, un chofer femenino a subi e cruzada sin nota at all cu tin Ambulans ta bin cu Sirena potente, luznan ta draai, y ta pidi caminda. Kizas e ta core den airco, y tin su Car Stereo tocando duro. Ademas semper ora di haya les di rijbewijs, bo ta worde instrui pa wak na banda tog ora di pasa un cruzada di luz di trafico, pa ta safe.
E chofer a djis subi caminda y pasa dilanti e Ambulans. Chofer di Ambulans no por a evita e accidente na altura di futuro Super Food na Bubali.
Ambulans a bay dal duro contra e Toyota Corolla, pone bay den un scual, ranca un palo di luz di trafico, y pega den un palo di mata di kwihi.
E Ambulans mes a bay finaliza banda di algun baranca grandi.
E chofer femenino di e auto a keda herida y pega den e vehiculo. A pidi presencia di Vehiculo di Rescate di Brandweer pa saca e victima for di e auto. Tanto e auto como e ambulance a ricibi basta daño material.
Esaki no ta prome desgracia serio unda ambulance ta accidenta seriamente na mesun lugar. Den pasado bayendo pa un accidente unda auto a dal peaton dilanti di La Cabana a yega di sosode un accidente similar te cu ambulance a bolter. Eynan tambe tabata tin varios herido e tempo ey entre otro esnan riba ambulance.
