Home Politica Analisis politico

Analisis politico

0
0
SHARE
- Advertisement -

Obligacion di nos tur!

Nos pueblo ta bibando un tempo hopi importante pa determina nos futuro. Nos a pasa den ocho aña di gobernacion di MEP y awo nos ta cerando tres aña di un gobierno di AVP. Tur hende por mira e diferencianan fundamental cu tin entre e dos gobiernonan. Ni con fanatico un hende por ta di MEP e diferencia ta uno di dia y nochi ariba tur tereno.

Den pasado nos a mira un gobierno di AVP cu a hereda un Aruba bancarota. E tempo ey MEP a causa cu  Lago a cera cu consecuencia di e pio crisis cu nos isla a conoce. E tempo ey MEP a caba e centenares di miyon florin extra cu Lago a paga  na gobierno. Miles di nos famianan mester a bandona nos isla pa busca un entrada pa  sobrevivi na otro pais. MEP mes no tabatin solucion pa e disaster cu nan a crea. Nan tabata  conseha nos hendenan pa bay Hulanda pasobra nan no tabatin ningun idea con pa soluciona e problema gigantesco cu nan a crea.

AVP a traha un “PLAN DI RESCATE” a bay den gobierno y a salba nos pais den un tempo record. Historia ta ripitiendo su mes. MEP a worde cori for di gobierno pasobra atrobe nan a crea un chaos total den gobernacion. Atrobe nos tin un gobierno di AVP ta solucionando e problemanan cu MEP a laga atras. Y atrobe nos ta mira e mentalidad destructivo di MEP cu ta e base cu ta pone cu un gobierno di MEP ta kibra tur cos ora nan ta den gobierno.

E liderazgo cu ta goberna e pais ta decisivo pa e nivel di e pais. Ya caba nos por mira claramente kico lo ta e gobierno di MEP atrobe pa nos pais.

Na prome luga tur hende por a mira con Evelyne a bira lider di partido. Esey caba ta papia pa su mes. Un hende drechi lo no a acepta liderazgo di e partido pasando over di e cadavernan di otro.

Despues lo a spera cu siquiera pa hunga comedia e mester a distancia su mes di e pasado corupto di su partido y su famia. Esaki no a sosode enfatizando asina cu e ta mescos cu nan y nada lo cambia bao di su liderazgo.

Riba tur esaki nos ta mira cu Evelyne a resulta un mentiroso patalogico cu aparentemente ta un exigencia pa por ta lider di MEP. Mentiranan bruto casi tur dia. Un par di dia pasa na un manera totalmente mentiroso Evelyne tabata demostrando dilanti di e ruina di Bushiri hotel. Increibel cu nan cu a causa e drama di Bushiri tin e mentalidad asina mentiroso y maligno pa purba di culpa e gobierno di AVP pa loke nan mes a causa. Un dia despues for di su boca ta sali otro mentira gañando cu Reina Beatrix lo a bisa algo malo di Aruba den su discurso na apertura di e aña nobo di Tweede Kamer. Mentira pero mentira total. Ta esaki ta e cultura di MEP pasobra tur e dirigentenan di MEP sa masha bon cu ta mentiranan ta e base di tur nan accionnan y nan ta kere seriamente cu esey ta politica.

Gaña y tene nan votadornan nan banda basa riba e mentiranan y lamentablemente tin un grupo chikito cu ta kere nan. Nos ta keda ripiti y enfatiza cu ta responsabilidad di nos tur pa haci todo por todo cu e hendenan aki no bin den gobierno nunca mas. Cada uno ariba nos isla cu dos dede di sinti ta mira cla cla kico MEP a para bira y cu no tin  ningun speranza pa cambio bao guia di e actual lidernan. Nos tur tin e responsabilidad di mustra tur votador e diferencia di un gobierno cu ta eleva nos calidad di bida tur dia den tur sorto di forma y cu a pone cu internacionalmente nos ta goza di un respet grandi compara cu un gobierno di destruccion disunion, corupcion y medida cruel. E   speranza cu a biba cerca hopi hende cu e bati cu MEP a haya den ultimo eleccion lo por a cambia nan pero esaki no ta e caso alcontrario ta parce cu nan a haya un rabia den nan curpa y a bira pio cu antes. Cu e rabia aki nan a bira mas peligroso cu nan tabata caba y ta obligacion di  nos tur pa cu nos pais pa percura cu e hendenan aki no bin den gobierno di nos isla nunca mas.

- Advertisement -

DUNA COMENTARIO

Please enter your comment!
Please enter your name here